Аҧсуа телехәаҧшра аҧҵара аҭоурых.

    Аҧсуа телехәаҧшра аҧҵара аҭоурых ахы акуеит 1977-1978 ш. рзы Аҧсны имҩаҧысуаз ахҭысқәа рхаан. Усҟан гәыҧҩык еицырдыруа аҧсуа уаажәларратә усзуҩцәа аҳәынҭқарра ахадара рахь ашәҟәы рыҩуеит, Қырҭтәыла Аҧсны имҩаҧнаго, аҧсуа жәлар ақырҭуа милаҭ рыларӡҩара иазкыу аполитика ишақәшаҳаҭым ала. Усҟан Қырҭтәыла Акоммунисттә партиа ацентртә комитет адҵала апартиа аобласттә комитет рықәыӡбеит ашәҟәы авторцәа.  Апленум иҟанаҵаз ақәӡбара, аҧсуаа зегьы ахә ршьеит рмилаҭтә хақәиҭреи рхьыҧшымреи иаҿагылоу акы акәны. Аҧсны зегьы иахьаҵанакуа еиҿыркаауа иалагеит амитингқәеи адемонстраципақәеи. Усҟантәи аполитикатә практика ишаҳнарбо еиҧш, ихәҵҟьоз амилаҭтә еиҿагылареи, ауаажәларратә гәнамӡарақәеи иаартны имҳәаӡакәа ирыӡбон аекономикатәи аиҿкааратәи аҧшьгарақәа рыла.
     Ауаажәларра злахәыз ақәгыларақәа аанкылахо иалагеит Асовет Еидгыла Акоммунисттә партиа ацентртә комитет, СССР Аминистрцәа Рсовет, ВЦСПС “Аҧснытәи АССР аекономикеи акультуреи раҧхьаҟатәи рыҿиара” захьӡыз ақәҵара анрыдыркыла ашьҭахь. Уаҟа иаҳәон “СССР Аминистрцәа Рсовет ателехәаҧшреи арадиои рзы аҳәынҭқарратә комитет иадҵазарц ,Аҧсны ателехәаҧшратә дырраҭарақәа реиҿкаара иацхраарц. Убри азыҳәаны х-мыз ирылагӡаны Аҧсныҟа иаарышьҭырц еиҭаҵуа ателехәаҧшратә станциа, иара убас егьырҭ иаҭахыу амыругақәа, ателехәаҧшра аиҿкааразы”. Уаҟа, иара убас иаҳәон 1978 ш. рзы Аҧсны ишазоужьхо иаҭахыу амаҭәахәқҿа ишьақәгыло ателехәаҧшра аиҿкааразы.
   Абри ақәҵара ҟалеит аҧсуа телехәаҧшра аҭоурых иашьаҭаркны. Убри алагьы, ихьшәаны акәзаргьы, аҧсышәала, хатәы бызшәала ицәажәеит ателехәаҧшра. Раҧхьатәи аҧсуа теледырраҭара аефир ахь иҭыҵит  1976 шықәса абҵара мзазы. Асааҭ 19.00 рзы ателеекранаҿы ицәырҵит Аҧсны аҳҭны-қалақь зныз асахьа. Убри аҽны Аҟәа, Лыхны, Ешыра, Кәтол, Тҟәарчал, Бзыҧ, Гагра, Пицунда уҳәа Аҧсны егьырҭ ақыҭақәеи ақалақьқәеи раҧхьаӡакәны аҧсышәала иаарылаҩит “Хәлбзиақәа, ҳаҭыр зқәу аҧсуа телехәаҧшцәа!”. Уи иацын нас, еснагь адырраҭарақәа хацзыркуаз, еицырдыруа аҧсуа жәлар рашәа “Шәнеибац” амлодиа. Убри ауха сааҭки бжаки ицоз адырраҭара хыркәшан аконцерт ала.
   Аҧснытәи ателехәаҧшра аҧҵареи ашьақәгылареи рҿы иалкаатәуп анаҩстәи аамҭақәа.
   Актәи апериод -  ари аиҿкаара иазкын. Ииун мза 1978 ш. инаркны ноиабр 1978 шықәсанӡа имҩаҧысуан арҿиаратәи анџьныр-техникатә еилазаарақәа русзуҩцәа, арҿиаратә конкурс мҩаҧганы ралҧшаара. Убри аамҭазгьы имҩаҧысуан ателехәаҧшреи арадиои акьыҧхьи реимадара арҕәҕәара, нас амассатә информациатә хархәагақәа рыбжьара ателехәаҧшра аҭыҧ аанкылара.
   Аҩбатәи апериод иаҵанакуеит аамҭа 1978 ш. анҵәамҭеи, апрель 1985 шықәсанӡеи. Убасҟан имҩаҧысуан аҧсуа тележурналистика ахырхарҭа ашьақәгылара. Аҧсуа тележурналистика ауаажәларратә процессқәа анырра рырҭартә еиҧш ашьақәгылара иаҿын.
   Ахҧатәи апериод иаҵанакуеит 1985 ш. аҽеиҩшамҭа – усҟан аҧсуа телехәаҧшра аиҿкаарылагьы, апрограммақәагьы рҽырыҧсхуан, ирыҧшаауан ателехәаҧшцәеи ателехәаҧшреи реимадара зырҕәҕәоз иҿыцу аформақәеи аметодқәеи.
   Анаҩсан 1989 ш. инаркны Аҧсны имҩаҧысуа иалагеит амилаҭтә зҵаарақәа ирызкыз аибарххарақәа. Ателепублицистикагьы аҽаҧсахит. Ателехәаҧшра аҽазнашәоит имҩаҧысуа ахҭысқәа раарҧшрала, ауаажәларратә гәаанагара аҧҵара, уи ашьақәгылара.
    Аиҭашьақәыргылара апериод аан аҧыжәара аиуит амҩаҧгаҩ, арепортиор, ахҳәааҟаҵаҩ иара ихаҭа, ҷыдалатәи иазнеишьа, аекран аҟынтәи игәаанагара аҳәара. Ицәырҵит атематикатә жанрқәа, еиҳа ибеиахоит адырраҭарақәа авидеоинформациа ала. Иалагалахоит ақәгыларақәа, аинтервиу, ахҳәааҟаҵара. Атехникатә хархәагақәа шазымхозгьы, маҷ-маҷ ишьақәгылоит  аинформациатә ҭыжьрақәа рструктура. Урҭ ирыҵаркуеит:
1. Ареспублика ауаажәларратә-политикатә ҧсҭазаара ажәабжьқәа;
2. Аекономика ажәабжьқәа
3. Аҳәаанырцәтәи ажәабжьқәа ахҳәааҟаҵаҩ ҿырҳәалатәи ибжьы аҵаҵаны;
4. Акультуратә жәабжьқәа
5. Аспорт жәабжьқәа
6. Амш зеиҧшрахо.

Аҧсуа телехәаҧшра аҧышәа ишаҳнарбо ала, изаамҭанутәи аинформациа ауаажәларра рызнагара аус, егьырҭ аиформациа амассатә хархәагақәа русзуҩцәеи дареи иеицеиҩыршоит. Аҧсуа телехәаҧшра алахәуп арадиои акьыҧхьи еицырзеиҧшу ажурналистикатә система. Аҧсуа студиа 80-тәи ашықәсқәа рзы ишьақәнарҕәҕәоит атәым ҳәынҭқарратә телерадиоеилахәырақәеи дареи рырҿиаратә еимадарақәа. Уаанӡа атәылаҿы имҩаҧысуаз ахҭысқәа, аҳәаанырцәтәи ажурналистцәа арахь иааны рхатәы ахҳәаақәа ҟарҵозҭгьы, 1982 ш. рзы раҧхьакәны еиҿкаан еицхырааны иҟаҵаз адырраҭара. Еиҿкаан сааҭбжак инаӡоз ателееимадара “Лыхны-Токио” агеронтологиа азҵаарақәа ирызкны. Уи дырбан Иапониатәи ателекомпаниа “Асахи”, “Иапониатәи ажәабжь дуқәа” захьӡыз аиформациатә дырраҭара аҟны. Аҧсуа телехҿаҧшра арҿиаратә гәҧ алахәын 1986 ш. рзы Германиа Адемократиатә республика аҟны имҩаҧысуаз Аҧсны акультура амшқәа.
   Аҧснытәи Автономтә Республика Иреиҳаӡоу Асовет Апрезидиум ақәҵарала сентиабр 10, 1991 ш. рзы Ателехәаҧшреи арадиои рзы аҳәынҭқарратә комитет  ахьӡ ҧсахын Аҧсуа ҳәынҭқарратә телерадиоеилахәыра ҳәа.
Последние события
13 Декабр 2017
60
Аҭыжьымҭаҿы:Ицәыргоуп 180 рҟынӡа усумҭа. Аҟəа иаатит Александр Чачба иаҧҵамҭақәа рцәыргақәҵа.
13 Декабр 2017
45
Уажәазы Аҧсаӡ хада азы иаахәаз арҧшӡагақәа кнарҳауеит.
13 Декабр 2017
31
Амобилтә еимадара иаҧнаҵаз акомиссиа есышықәса астудентцәа рыбжьара иреиҕьу алнахуеит. .
13 Декабр 2017
63
Аҧсны аҧыза-министр Беслан Барцыц Аҟәеи , Афон Ҿыци, Гәдоуҭеи рықалақьқәа рхадацәа амашьынақәа риҭеит .
12 Декабр 2017
75
Аҭыжьымҭаҿы:Иааиуа ашықәсазтәи  аҳәынҭқарратә биуџьет апроект актәи аҧхьарала ирыдыркылеит Жәлар Реизара адепутатцәа
Загрузка плеера
Алаҳәарақәеи адныҳәаларақәеи
АГТРК