Аҟəа иаартхоит алагерқəа ҩба.

07.06.2017
663

Есышықәса еиҧш сынтәагьы ахәыҷқәа аҧхынтәи рыҧсшьара аамҭа аинтерес аҵаны ирхыргарц азы Аҟәа ақалақь аҟны иаартхоит алагерқәа ҩба.

Ахатәы зеиҧшдырратә школ «Альфа» уажәшьҭа традициак ирзаҩызахеит аҧхынра ахәыҷқәа рзы алагер аиҿкаара. Абар уажәшьҭа жәаф шықәса ҵуеит ари ашкол аҿы ахәыҷқәа аҧхынтәи аҧсшьараамҭа рхыргоижьҭеи. Рашәара мза жәаҩа рзы ихацыркхо алагер  темас  ишьҭнахит аҧсуа бызшәа ахәыҷқәа рыларҵәара. Ашкол «Альфа» аиҳабы Фатима Даутиаҧҳа иазгәалҭеит, алагер аус шауло нанҳәа жәеизанӡа. Аҭааҩцәа ракәзар, фышықәса инаркны жәаха рҟынӡа зхыҵуа ракәхоит. Алагер ахь  иааир рылшоит изҭаху зегьы. Апрограмма шьақәгылоуп еиуеиҧшым аинтерес зҵоу ауснагӡатәқәа рыла. Урҭ зегьы аҧсышәала ауп ишымҩаҧысло.

Ари алагер  афинанстә цхыраара ахьамам азы, аҭаацәа рхарџь алоуп ишеиҿкаау. Ҩымчыбжь алагер аҿы аҟазаара аа-нызқь мааҭ иаҧсоуп. Уахь иаҵанакуеит хынтә акрыфара, ахәыҷқәа амшын ахь ргара, еиуеиҧшым асекциақәа рахь аныҟәара, аҭыхра, анапкымҭақәа рыҟаҵара, ашәаҳәара, амастер-классқәа, аицлабрақәа, аныҟәарақәа уҳәа. Алагер  х-гәыҧкны ишьақәгылахоит. Гәыҧ цыҧхьаӡа жәохә мшы рымоуп.  Ашьыжь асааҭ жәба инаркны быжьбанӡа ахәыҷқәа рыҧсшьара рхыргоит. Ахәыҷқәа рааӡареи рыҧсшьаратә мшқәа рхы ргәаҿы иаанхо аҟаҵареи роуп хықәкыс иамоу алагер «Альфа».

Лаҵарамза зеижә инаркны Аҟәа ақалақь аҵараусбарҭа анаҧхгара Аҟәатәи жәаҩатәи абжьаратә школ аҟны еиҿнакаауеит хәыда ҧсада аус зуа алагер «Алашарбага». Фышықәса раахыс ес-ҧхынра хышәи хынҩажәа ҩык рҿынӡа ахәыҷқәа аднакылоит.  Нанҳәа мза акынӡа  аус зуло алагер «Алашарбага»  ахь иаарыҧхьо ахәыҷқәа хаҭала Аҟәа ақалақь аҿы инхо ракәхоит.

Ахәыҷқәа ахылаҧшра бзиа рымоуп, ашьыжь инаркны асааҭ фба рҟынӡа алагер аҿы иҟазаауеит. Урҭ аҧышәа змоу рааӡаҩцәа ракәзар, ишьақәыргыланы ирымоу аҵара ааӡара иаҵанакуа рхатә план ала аус руеит. Жәаҩатәи абжьаратә школ аиҳабы Рита Лакрҧҳа лажәақәа рыла, араҟа ахәыҷқәа ахәмарреи аҧсшьареи рзы алшарақәа рзаҧҵоуп.

Иҳәатәуп, иара убасгьы, алагер «Алашарбага» аус шрыцруло аҭагылазаашьа ҷыдақәа рзы аминистрреи асанитартә епидемстанциеи русзуҩцәа. Мышқәак рышьҭахь зусура хацзыркуа арҭ аҩ-лагеркгьы аҭааҩцәа хәыҷқәа ирзыҧшуп. Игәыҕуеит, урҭ рыҧсшьара мшқәа ибзианы аиҿкаара рылшап ҳәа.

Наала Чхьынџьериаҧҳа, Ельдар Дамиров, АТ.




Оцените новость:
+1
+2
+3
+4
+5

Сохраните ссылку или поделитесь с друзьями

Возврат к списку

 
Последние события
1
Ари ацәыргақәҵаҿы асахьақәа ахәшьара рырҭон зҧышәа ҳараку асахьаҭыхҩцәа.
5
Урҭ рҟны еуеиҧшым атемақәа ирылацәажәон Аҧсныи Урыстәылеи рхаҭарнакцәа .
3
Ари ашықәсазы аицлабраҿы иқәыргылан аноминациақәа ааба.
45
Абарҭ азҵаарақәа ирызкын Ауаажәларатә палатаҿы имҩаҧгаз аилатәара .
Алаҳәарақәеи адныҳәаларақәеи
АГТРК