Ихыркәшахеит акциа «Афырхацәа рымҩахәасҭала»

06.07.2017
807

Ихыркәшахеит акциа «Афырхацәа  рымҩахәасҭала»,  аҿартә политиказы аҳәынҭқарратә еилакы еиҿнааказ апроект. Сынтәа   фышықәса ҵуеит иара мҩаҧысуеижьҭеи.      Ари аусмҩаҧгатә иабзоураны,  аҿар  Аҧсны аџьынџьтәылатә еибашьра иазкны еилыркааз рацәоуп.  

Акциа «Афырхацәа рымҩахәасҭала» шәи ҩынеижәи жәаҩык алахәылацәа шьапыла ианысит Аҧсны  Аџьынџьтәылатә еибашьра  аан  ииультәи ажәылараҿ аибашьцәа знысуаз амҩа. Ҩымш ирылагӡаны Ешырантәи шьапыла мацарала Иашҭыхәанӡа инаӡеит. Дара урҭ аҭыҧқәа рҿы ирзыҧшын аибашьра аветеранцәа. Аныҟәарақәа раан   аиҿахысрақәа ахьыҟази  аибашьцәа ахьҭахози аҭыҧқәеи рҿы иаааҭгыланы аибашьра аветеранцәа, аҿар  ирзеиҭарҳәон доусы иргәалашәоз ахҭысқәа. Ари аҩыза акциақәа аҿар рзеиҿкаара ахәҭоуп ҳәа азырыҧхьаӡоит  аветеранцәа.

Акциа алахәылацәа рҟынтәи дыҟамзар ҟалап аӡәгьы ашоуреи, амҩа бааҧсқәеи ззымычҳаз, дара рҿаҧхьа иқәдыргылоз ахықәкы  -   ҳаибашьцәа знысыз амҩа анысра. Ҭыҧқәак рҿы   амҩақәа маншәалазҭгьы, даҽаџьара, шахада узылбаауамызт. Уи аҿы арҧарцәа аҭыҧҳацәа ирыцхраауан.
Арҭ аныҟәарақәа аҿар  гәахырала ирыдыркылеит. Урҭ рахьтә  дыҟоуп акциа аветеран ҳәа ззуҳәар зылшо Ҳаџьараҭ Ҳашымба. Иара сынтәа ҧшьынтәуп ари амҩа данысуеижьҭеи.

Акциа иалахәыз   неиуеит  Каман игылоу иҭахаз ҳаибашьцәа ирызку абаҟахьы. Араҟа аҿар иргәаладыршәеит иҭахаз  аибашьцәа минуҭктәи аҿымҭрала. Актәи амш аҽны,  ахәылҧаз  Каман ақыҭан еиҿыркаауеит алагер. Араҟа  акциа иалахәыз  идырбан аибашьратә хроника, инарыгӡон ашәақәа. Анаҩс аҿар рҭааит Аҧсны  Ахада ихаҭыҧуаҩ    Витали Габниеи , Аҧсны  Афырхаҵа Шамиль Аӡынбеи. Дара аҿар ирзеиҭарҳәон аибашьра  аан ирхыргаз  хҭысқәак. Анаҩс шьыжьнаҵы  акциа алахәылацәа рымҩа иацырҵеит Иашҭыхәа ақыҭахь, ииультәи ажәылараан иҭахаз атанкистцәа ирызкны игылоу абаҟа ашҟа.

Абас ала ихыркәшахеит аҿартә политиказы аҳәынҭқарратә еилакы ахаҭарнакцәа еиҿыркааз акциа. Аҭоурых амырӡреи, аҿар аҧсадгьыл ахь абзиабара рылааӡареи ауп акциа аҿаҧхьа иқәгылаз. Уи ахықәкы нагӡахеит ҳәа азырыҧхьаӡоит акциа алахәылацәа.

Наала Чхьынџьериаҧҳа, Беслан Чхьынџьериаҧҳа, АТ.




Оцените новость:
+1
+2
+3
+4
+5

Сохраните ссылку или поделитесь с друзьями

Возврат к списку

 
Последние события
14
Уи иалахәын аҭҵаарадырратәи арҿиаратәи интеллигенциа рхаҭарнакцәа,аполитикцәа,жәлар реизара адепутатцәа.
20
Иҟалаз ахҭыс инамаданы, араион анапхгара ауснагӡатәқәа реиҿкаара азгәаҭаны ирымоуп.
7
Аҭыжьымҭаҿы:Аҧсныи Шьамтәылеи ирыбжьарҵаз аиқәшаҳаҭрақәа шьақәдырҕәҕәеит, аҳәынҭбиуџьет актәи аҧхьараҿы ирыдыркылеит. Жәлар реизара аилатәара аҟынтәи анҵамҭа.
10
Урҭ ирылахәыз Абызшәатә политиказы аҳәынҭқарратә еилак аҟны иранашьан асертификатқәа.
17
Уи авторс дамоуп Аҧсны аҭҵаарадыррақәа ракадемиа академик, апрофессор Ҭеимураз Ачыгәба.
7
Амшхәаҧштә аҟны иқәгылан жә-зҵаарак.
Алаҳәарақәеи адныҳәаларақәеи
АГТРК