Имҩаҧысит «Амшын аҧшаҳәаҿы анеиааира» захьӡу ахәбатәи аҿартә жәларбжьаратәи Арт- фестиваль.

25.09.2017
443

Имҩаҧысит  «Амшын аҧшаҳәаҿы анеиааира» захьӡу ахәбатәи аҿартә жәларбжьаратәи Арт- фестиваль. Уи еиҿыркааит Иван Папасқьыр ихьӡ зху Амилаҭтә библиотекеи Аҧсны акультуреи, аҭоурыхтә культуратә ҭынха ахьчареи рминистрреи.   Аусмҩаҧгатә аҳәаақәа ирҭагӡаны аҭааҩцәа рзы иаҧҵан тематикала еиуеиҧшымыз аҭыҧқәа жәеиза.

Алитературеи, абиблиотекақәеи, амилаҭтә напҟазареи, амодеи, акәашареи, аспорти уҳәа ракәын изызкыз тематикала еиуеиҧшымыз жәеиза кәакь. Кәакь цыҧхьаӡа, ахәаҧшцәа рзы, доусы русумҭақәа ӡырыргон. Акәакьқәа  руак иадгылаз аҭыҧҳацәа Мадленеи Салимеи, раҧхьаӡа акәны иалахәуп ари аҩыза афестиваль. Аҭааҩцәа ирыдыргалозгьы хаҭала дара зҭоу, Аҟәатәи алицеи -интернат аҵаҩцәа русумҭақәа ракәын.  

Абиблиотека ашҭаҿы ауаа шырацәазгьы, иубарҭан доусы иаҳа илаҧш иҵашәоз закәыз. Хаҭала афестиваль аҿы иаҳа иалыркаауаз експонатын Џьгьарда ақыҭантәи иаагаз агара. Ақыҭа амузеи аусзуҩ  Лили Қәаранӡиа  илҳәоит, агара ишааӡахьаз Амҷаа рыжәла аҟынтәи имаҷымкәа абиҧарақәа. Уажәазы хышә шықәса инареиҳаны изхыҵуа агара  лара лнапы аҵаҟа иҟоуп. Уи адагьы арт-фестиваль ахь иаалгеит аҧсуаа ажәытәан рхы иадырхәоз амаҭәарқәагьы.

Ахцәыҟаҵаразы мастер класс инаркны аҽыбҕаҟазара иаҵанакуа акәакь аҟынӡа, ирацәан арт-фестиваль иамҽханакыз. Аҽырыҩрақәа рҟны акырынтә аҧхьахә згахьаз Беслан Аҧҳазоу иҽы Тиадор иадгыланы асасцәа рфотосахьақәа ҭырхуан.  Иҟан ашәҟәқәа  ирызкыз аҭыҧгьы. Араҟа доусы  ргәы иақәшәоз аҩымҭа, мамзаргьы арҵагатә шәҟәқәа ргар рылшон.

Сынтәа хәышықәсоуп зымҽхак ҭбаау афестиваль ауаа рацәа алархәны имҩаҧысуеижьҭеи. Уи  еизнагеит  Аҧсны араионтә библиотекақәеи Аҟәатәи амузеии русзуҩцәа. Иҟан Москва, Адыгеиа, Краснодартәи атәылаҿацә уҳәа рҟынтәи ааҧхьара змаз абиблиотекақәа русзуҩцәагьы. Рҟазара аадырҧшуан Аҧсны араионқәа зегь рырҿиаратә коллективқәа. Ҵыҧх имҩаҧгаз афестиваль еизнагахьан ф-нызқьҩык рҟынӡа ауааҧсыра. Уажәтәигьы имаҷымқәа ауаа аднаҧхьалеит ҳәа агәыҕра аадырҧшуеит аиҿкааҩцәа.
Абиблиотека аусзуҩцәа агәра ргоит еиҿыркааз аусмҩаҧгатә илахҿыху ныҳәаны есышықәса ишыҟало, афестиваль иамҽханакыз аҭыҧқәа ирҭаауаз зегьы, ирхамшҭуа хҭысны ишаанхо. Ҩымз инареиҳаны рҽыззыҟарҵоз афестиваль мышкоуп ианымҩаҧысуаз, уи аиҿкааҩцәа ирҳәоит, ауааҧсыра  рырҕәырҕьара рылшазар, дара рзы еиҳау акагь шыҟам.

Наала Чхьынџьериаҧҳа, Леон Адлеиба, АТ.


Оцените новость:
+1
+2
+3
+4
+5

Сохраните ссылку или поделитесь с друзьями

Возврат к списку

 
Последние события
17 Маи 2018
85
Жәларбжьаратәи амузеиқәа рышм аҽны аҵх агәанынӡа Аҟәа иаартызаауеит амузеиқәа хҧа.
17 Маи 2018
130
Аҳәынқарра Ахада иҟаиҵаза Аусҧҟа инақәыршәаны, аибилеи аҳаҭыр азы гәыҧҩык адипломантцәа чынла иҳаракын.
16 Маи 2018
129
Аҧсны аҵареи аҭҵаарадырреи рминистрра атəыла Ахада иахь иҟарҵаз аҳəара инақəыршəаны, урҭ раахəаразы аҧара рзоужьын Аҧсны Ахада ифонд аҟынтə.
16 Маи 2018
122
Аҟəатəи ақалақьтə еизара аҟны ари азҵаара ӡбаахаанӡа уаанӡатəи ахəҧсала аус рулоит..
Загрузка плеера
Алаҳәарақәеи адныҳәаларақәеи
АГТРК