Аҧсныи Аахыҵ - Уаҧстәылеи руааҧсыра визада еиҭанеиааилоит. Жәлар реизара аилатәараҿы ирыдыркылеит азакуан апроектқәа жәпакы.

06.04.2016
903

Аҧсныи Аахыҵ - Уаҧстәылеи руааҧсыра  визада реиҭанеиаареи, аҳәаанырцәтәи атәылауаа ҳреспубликаҿы рыҟазаара азакуани, аҳәынҭқарратә аҳазалхратә закуан аҧсахрақәа ралагалареи  уҳәа, абарҭ азҵаарақәа ирылацәажәон Аҧсны Жәлар Реизара аилатәараҿы.

Аҧсны Жәлар Реизара адепутатцәа излацәажәаран иҟаз раҧхьатәи зҵааран Аҧсны аҧыза министр Артур Амқәаб  иахь агәрамгара  аарҧшра. Иазгәаҭатәуп,  раҧхьаӡа акәны ари азҵаара шцәыргаз  Аҧсны Жәлар Реизара аилатәараҿы  февраль хҧа рзы.    Ақәҵара аус адызулоз адепутат Алмас Џьапуа аҳәара ҟаиҵеит ,ари азҵаара иааиуа аилатәарахь иигазарц, избанзар, уи излеиҳәаз ала,  иоуит ақәҵара иалагалатәу, аха макьана   аус адулара зҭахыу, аинформациа ҿыц.  

Жәлар Реизара адепутатцәа ахәаҧшит Аҳәынҭқарратә ҳазалхратә закәан аҧсахрақәа ралагаларазы ирыдгалаз апроект . Иара  хҳәаада ирыдыркылеит  аҩбатәи аҧхьараҿы.  Аҩбатәи аҧхьараҿы ирыдыркылеит  иара убас  Аҧсныи Аахыҵ Уаҧстәылеи ртәылауаа визада реиҭанаиааиразы аиқәышаҳаҭра. Жәлар Реизараҿы иҟоу Аҧсны ахада ихаҭарнак Дмитри Шамба иажәақәа рыла, уи аиқәышаҳаҭраҿы иарбоуп аҩ-ҳәынҭқаррак ртәылауаа азин шрымоу рхаҭара шьақәзыргылоу ашәҟәы  ала  аҳәаа ахысреи атәыла аҩныҵҟа аҟазаареи.

Анаҩс,  Жәлар Реизара адепутат Ҭемыр Гәлиа ахәаҧшразы ирыдигалеит Административтә зинеилагаразы азакуан аҧсахрақәа ралагалара – ҳтәыла иаҭаауа аҧсшьацәеи, ҳтәыла ауааҧсыреи  амшын ҭалагатә шәҵатәыла ауаажәларратә ҭыҧқәа рҿы рыҟазааразы ахараҧса рыдҵара азҧхьагәазҭо. Аҧсны ахада ихаҭарнак Дмитри Шамба иҳәеит, ари азҵааразы ахараҧса адгалара мыцхәны ишыиҧхьаӡо, иазгәаиҭеит, ауаа мыцхәы еилыхны ақалақь аҿы имныҟәаларц, уи атәы зҳәо аҩырақәа шыҟаҵатәу. Жәлар Реизара адепутатцәа гәыҧҩык ари азакуан аҧсахрақәа алагаларазы ргәаанагарақәа рҳәеит, анаҩс бжьыҭирала ирыдыркылеит  актәи аҧхьараҿы.

Адепутатцәа ахәаҧшит иара убас, амашьынақәа рҿы асаркьа ареиқәаҵәара азин аҟаҵара азҵаатәы. Апроетк  рыдызгалаз  Алмас Џьапуа иҳәеит ,аилак аҩныҵҟа ари азҵаара алацәажәара шымҩаҧысуаз аҩныҵҟатәи аусқәа рминистрра аусзуҩцәа алархәны. Иара адепутатцәа идирбеит ҩажәи жәохә процент алашара аузышьҭуа  асаркьа зеиҧшроу,  иҳәеит уи амашәыр зхылҿиаауа ак акәны ишыимыҧхьаӡо. Азакәан апроект алацәажәара ашьҭахь, ирыдыркылеит актәии аҩбатәии аҧхьарақәа рҿы.

Анаҩс,адепутатцәа ахәаҧшит Аҳәаанырцәтәи атәылауаа Аҧсны рыҟазаара азиншьаҭа рызҭо азакәан аҧсахрақәа ралагалара . Апроект аҿы иазгәаҭоуп аҳәаанырцәтәи атәылауаа  анхаразы ашәҟәы рыҭаразы азин. Адепутат Бежан Убириа еиқәыиҧхьаӡеит ус еиҧш азин зырҭо  рахь иаҵанакуа ауаа. Иаҳҳәап,  аҳәаанырцәтәи атәылауаҩи Аҧсны атәылауаҩи еимазар. Ари азҵаара аганахьала  Дмитри Шамба иҳәеит, Аҧсны ахада адгылара шаиҭо аҳәаанырцәтәи атәылауаа авиза роура армариара. Иаагозар, авизақәа рыҭазар ауеит еиуеиҧышм  аҳәынҭқаррақәа ртәылауаа ркатегориақәа рыла акәымкәа, урҭ Аҧсныҟа раара мзызс иамоу азҵаара иахәаҧшны. Аҳәаанырцәтәи атәылауаа анхаразы азин шәҟәы рыҭара азҵаара акәзар, уи ашәҟәы аиура азин рымоуп атәылауаҩшәҟәы змам, аха убри аан жәашықәса инареиҳаны Аҧсны инхо– азгәаиҭеит Дмитри Шамба. Адепутат Иури Зыхәба игәаанагарла, арҭ  аҧсахрақәа рыдкылара аҭахны иҧхьаӡом, иара иҳәеит иахәҭаны ишыиҧхьаӡо уи хшыҩзышьҭра аҭаны аҭҵаара.   Аилацәажәара ашьҭахь, ари азакәан апроект рыдыркылеит  актәи аҧхьараҿы. Жәлар реизараҿы изхәаҧшраны иҟаз егьырҭ азҵаарақәа ииган иааиуа аилатәарахь.

Альбина Жьиҧҳа, Роберт Ломиа, Асҭамыр Гәажәба,АТ

Оцените новость:
+1
+2
+3
+4
+5

Сохраните ссылку или поделитесь с друзьями

Возврат к списку

 
Последние события
5
Аҭыжьымҭаҿы:Ахырхарҭақәа жәпакы рҟны аусеицуразы еиқәышаҳаҭхеит. Аҧсныи Ҟрыми реиҳабырабжьаратә комиссиақәа актәи реилатәара.
12
Иара Аҧсны амилаҭтә олимпиатә еилакы аҿы  адныҳәаларақәа идикылон
15
Убри инамаданы имҩаҧган афонд ахаҭарнакцәа злахәыз апресс-конференциа.
24
Апроект авторс дамоуп ашәаҳәаҩ, акомпозитор, Хьыбла Мықәҧҳа.
Алаҳәарақәеи адныҳәаларақәеи
АГТРК