Мышқәак рыҩныҵҟа Аҟәа аусура иалагоит аӡцрыҵқәа ррыцқьаратә станциа ҿыц.

06.04.2016
852

Мышқәак рыҩныҵҟа Аҟәа аусура иалагоит аӡцрыҵқәа ррыцқьаратә станциа ҿыц. Аспециалистцәа ражәақәа рыла, уи  иалшоит ақалақь зегьы амаҵ аура. Ари астанциа ргылан Голландиатәи аспециалистцәа еиқәдыршәаз апроект ала, иара иақәхарџьын фышәи жәба миллион мааҭ. Имҩаҧысит ҧышәарак аҳасабала уи  раҧхьаӡа акуны   аус арура. Аспециалистцәа ражәақәа рыла, астанциа  аус шауа агәаҭара лҵшәабзиала имҩаҧысит.
  
Арыцқьаратә станциа аусура аларгаразы ихиоуп. Арыцқьаратә шьақгәылақәа зегьы рылшара гәаҭоуп. Уи аҧышәарагьы иахыжьын.   Астанциа алшарақәа зегьы рымҽхак ала аусура ианалагалак , уи сааҭк аҩныҵҟа ҩажәижәаба нызқь кубаметр  аӡы арыцқьара алшалоит. Апроект  аҧара рацәа ахҭынҵоуп, аргыларатә усурақәа мҩаҧысуан фышықәса рыҩныҵҟа, ари аамҭа иалагӡаны арыцқьаратә астанциа ҟаҵан европатәи ашәага- загақәа ирықәшәо.

Мирон Чачхалиа Аҟәа ақалақь аканализациа арыцқьаратә станциа деиҳабуп. Иара араҟа аус иуеижьҭеи уажәшьҭа ҩажәи жәба шықәса иреиҳауп. Уи ибзианы игәалашәоит аибашьра ҟалаанӡа  астанциа аусура шеиҿкааз атәы. Мышкы ҧшынтә рҽеиҭныҧсахланы араҟа аус руан ҧшьынҩажәаҩык ауаа. Астанциа аусура аҟазшьа ҷыда амоуп, убри аҟынтә ара аус ауразы  аҧышәеиҧш адырра бзиақәагьы аҭахуп. Иааҟәымҵӡакәа ирхылаҧшлатәуп имҩаҧысуа апроцессқәа. Ҷыдалатәи агәаҭара рымазар ауп  аӡы зрыцқьо абактериақәа рхымҩаҧгашьа, урҭ рхыҧхьаӡара жәа-хкык иреиҳауп.

Арахь иааиуа аӡы ҟьашь ицқьахаанӡа изхысуа аетапқәа рацәоуп. Актәи аан, иара аизгарҭахь иҭалоит, анаҩс  аихатәы еихда иҭысуеит. Ари аихдаҿы инхоит  зыкапан хаҳәссак аасҭа еиҳау агәам, Аӡы арыцқьаратә резервуарқәа рахь ииасаанӡа иӡаатәалоит уи иаҵоу аҧслымӡ.  Анаҩс ауп аӡы арыцқьара рҽаназыркуа абактериақәа. Астанциа аусзуҩцәа ражәақәа рыла, аҵыхәтəантәи аӡы ацқьара, аӡрыжәтә иадукылар ауеит. Километраки бжаки инеиуа аӡымҩангагақәа ирҭысны амшын иалаҭәо иара, аҧсабара азы шәарҭара ацӡам.

Ҳәарада, ари апроект  амҽхак акыр иҭбаауп. Иара аусура аҳәаақәҵаразы иаанхаз рацәаӡам. Еиқәыршәоуп аусзуҩцәа рсиагьы. Алацәажәарақәа рнаҩс иӡбан, ари астанциа хазы иҟоу усбарҭаны аҟаҵара. Аҟәа ақалақь аканализациа арыцқьаратә станциа аусура хацыркхоит иаарласны. Аҧышәаратә аамҭа иазыҧҵәоуп хымш, уи лҵшәабзиала ианхырқәшаха, имҩаҧысраны иҟоуп ацрыӡрыцқьаратә станциа аофициалтә аартрагьы.

Елана Лашәриа, Беслан Џьынџьал , АТ.


Оцените новость:
+1
+2
+3
+4
+5

Сохраните ссылку или поделитесь с друзьями

Возврат к списку

 
Последние события
15 Август 2018
70
15 Август 2018
59
Араҟа еизгаз аҧара афонд« Ашана »иахыҧхьаӡалахоит .
15 Август 2018
63
Уи иазыҧҵәоу аамҭа иалагӡаны апаспорт аиуразы ашәҟәқәа алазымҵаз ирымоу рдокументқәа амч рцәыӡуеит.
15 Август 2018
57
Аҧсны ахадареи аибашьра аветеранцəеи ашәҭқәа шьҭарҵеит хатәгәаҧхарала иҳацхраауаз иҭахаз рбаҟа амҵан.
14 Август 2018
41
Загрузка плеера
Алаҳәарақәеи адныҳәаларақәеи
АГТРК