Аҧснытәи аҳәынҭқарратә университет аҿы Иури Воронов изкыз аконференциа мҩаҧысит.

28.04.2016
1015

Еицырдыруа археолог, аҵарауаҩ ду, Кавказҭҵааҩы, ауаажәларратә усзуҩ Иури Воронов иҧсы ҭаны дыҟазҭгьы маи ааба рзы  ханҩажәи жохә шықәса ихыҵуан. Ҳтәылаҿы аҵыхәтантәи аамҭазы лассы-лассы еиҿыркаауеит уи иҧсҭазаареи ирҿиаратә мҩеи ртәы  зҳәо  ахәылҧазқәеи апресс-конференциақәеи. Аҧснытәи аҳәынҭқарратә университет аҿы имҩаҧысыз Иури Воронов ицәыргам иусумҭақәеи, уаанӡа зыӡбахә ҳәамыз иҧсҭазаара афактқәеи раарҧшра иазкыз аконференциаҿы астудентцәа аҵарауаҩ ду ибиографиеи, уи жәларбжьаратәи иҩаӡареи ирылацәажәан.

«Милаҭла саурысуп, аха доуҳала саҧсилуп», длафуа абас ихы иазиҳәон Воронов. Иара  иҧсадгьыл Аҧсны лымкаала бзиа ибон.  Иусумҭақәа реиҳарак зызкыз  уи ажәытәтәи аҭоурых аҭҵаара акәын.Ҧсбарала абаҩхатәра ҷыда змаз, хшыҩла адунеи аҵарауаа дуқәа ирхыҧхьаӡалаз иара иааиҧмырҟьаӡакәа аҭҵаарадырра инапы алакын.  Иури Николаи-иҧа  иҭижьхьан  жәабала ашәҟәқәа, урҭ рхыҧхьаӡараҿы еицырдыруа  «Белая книга Абхазии». Хәышә иреиҳаны анауакатә кьыҧхьымҭақәа дравторуп, урҭ рахьтә ҩажәи жәаба монографиақәоуп.

Иури Воронов иҭҵаарадырратә усумҭақәа рхы иадырхәоит астудентцәа реиҧш, еицырдыруа археологцәагьы. Иара иҩыза, иколлега археолог Олег Бҕажәба иҳәоит, Воронов иибоз аџьааба ду ишалҵшәахаз  анаукаҿы иоуз ақәҿиара дуқәа. Маи ааба рзы аҵарауаҩ ииубилеи азгәарҭоит. Воронов изку аконференциа аиҿкааҩцәа  ргәаанагарала асеиҧш аиҧыларақәа аҵак ду рымоуп аҿар Иури Воронов еиҧш иҟоу иналукааша аҵарауаа рҭоурых деилыркааразы.

Аҧсны археологиатә ҭҵаарадырра Иури Воронов ихьӡ иузаҟәымҭхо иадҳәалоуп. Иара убасгьы амилаҭтә хақәиҭратә қәҧараҿы уи иџьабаа акыр ирацәоуп. Иидыруаз  ажәытәтәи аамҭа иаҵанакуа афактқәа ихы иархәаны илиршон имцыркыз ақырҭуа ҵарауаа рҭоурыхтә теориақауа рҿагылара, ауаа рҿынӡа аиаша анагара. Ҳтәыла азы ихьанҭаз аамҭақәа рзы инапы злакыз ауаажәларратә ус аҭыҧ ду ааннакылон,  иара аҳәаанырцә ҳҿахәы зҳәоз дыруаӡәкын.
Иури Воронов изку аконференциа ари ауадаҿы амҩаҧгара  машәыршақә иҟалаз акы акәӡам. Уи иара ихьӡ ахуп. Араҟа лассы-лассы имҩаҧыргоит еиуеиҧшым аиҧыларақәеи ақәгыларақәеи. Иаҧҵоуп иара убасгьы иара ихьӡ ала астипендиа.

Иазгәаҭатәуп, Иури Николаи-иҧа Воронов Аҧснытәи аҳәынҭқарратә университет аҿы раҧхьатәи апрофессор ҳәа иӡбахә ҳәан, иара уасгбьы раҧхьаӡа акәны иара иоуп изанашьаз Ахьӡ-аҧша аорден актәи аҩаӡара. Воронов иҭархара ҳмилаҭ зегьы рзыҳәан мацара акәымкәа жәларбжьаратәи  аҭҵаарадырра азгьы ицәыӡ духеит.

Елана Лашәриа, Беслан Џьынџьал. АТ

Оцените новость:
+1
+2
+3
+4
+5

Сохраните ссылку или поделитесь с друзьями

Возврат к списку

 
Последние события
3
Убри инадҳәаланы ҳтәыла ашколқәа рҿы имҩаҧысуеит агәыҳалалра иазку аурокқәа.
7
Уаҟа аҧсуа монетақәа ирызку аинформациа аҧхьатәи адаҟьақәа рҿы икьыҧхьуп.
Алаҳәарақәеи адныҳәаларақәеи
АГТРК