Аҧсны Жәлар Рџьынџьтәылатә еибашьра ахьаа ззыннажьыз аветеранцәа рчымазара ашьақәыргылара азҵаарақәа ирызкны аилацәажәара мҩаҧигеит Аҧсны Ахада.

01.11.2016
557

Аҧсны Жәлар Рџьынџьтәылатә еибашьра ахьаа ззыннажьыз  аветеранцәа рчымазара ашьақәыргылара азҵаарақәа ирызкны аилацәажәара мҩаҧигеит Аҧсны Ахада.

Рауль Ҳаџьымба иҳәеит, аветеранцәа рыхәрақәа зеиҧшроу ашьақәыргыларазы ишахәҭоу аусурақәа реиҿкаара аҭахны ишибо.

Аилацәажәара аартуа, Аҧсны Ахада Рауль Ҳаџьымба иҳәеит,  уи  шазку аибашьра ааха зманы иалҵыз ауаа аинвалидра  ииашаны иахьынӡарымоуи, аветеранцәа ахәшәқәа рыла реиқәыршәареи, апротезқәа рыҟаҵареи  ирыдҳәалоу азҵаарақәа. Рауль Ҳаџьымба иазгәеиҭеит, аибашьра ашьҭахь  иаразнак ишьақәыргылаз асиақәа ирныз рхыҧхьаӡара акырантә ишацлахьоу. Аҳәынҭқарра Ахада иҳәеит, ус ҟалашьа шамам. Убри инамаданы, асиақәа ишеиҭарыхәаҧштәу. Хазы дазааҭгылеит аветеранцәа-аинвалидцәа ргәабзиара ашьақәыргылараҿы ихымҧадатәу ахәшәқәа рыла реиқәыршәара шымҩаҧысуа атәы. Рауль Ҳаџьымба имӡаӡеит, уи азы агәынамӡара шимоу. Иара иҳәеит,  уа-ҭахыла акәымкәа урҭ ахәшәқәа ииашаны изыхәҭоу ишрыҭалатәу.

Аҧсны Ахада  иҳәеит, хазы игоу, зыӡбара хымҧадатәу зҵаараны ишыҟоу  Гагратәи агәабзиарашьақәыргыларатә центр аусурагьы. Аминистрцәа реилазаара дҵаны ириҭеит,  уи  хылаҧшра арҭарц азы. Убри аан аҳәынҭқарра Ахада иазгәеиҭеит,  иаарласны  зыӡбара напы арктәу акы  акәны ишыҟоу аветеранцәа апротезқәа рыла реиқәыршәара азҵаатәгьы. Убри аан Аҧсны Ахада ихаҭыҧуаҩ Витали Габниа иҳәеит ,Рауль Ҳаџьымба иажәалагала ала аинвалидцәа рсиақәа шьҭыхны реиҭагәаҭара аҭахны ишиаҧхьаӡо. Иааигеит ахыҧхьаӡарақәа. Урҭ  еиҿурҧшуазар, аҵыхәтәантәи ашықәс азы мацара иацлаз аинвалидцәа рхыҧхьаӡара хәышәҩык инарзынаҧшуеит.

Витали Габниа иазгәеиҭеит, ҳаамҭазы ишыуадаҩу аибашьра ааха зманы иалҵыз аветеранцәа аинвалидра зрыҭаз агәаҭара. Даҽа усуп, иацло ахыҧхьаӡарақәа хылаҧшра рыҭара. Ахада ихаҭыҧуаҩ  иаахтны  иҳәеит,  аинвалидра аиуразы иҟоу аҧҟарақәа аҧсахрақәа рылагалара аҭахуп ҳәа шиаҧхьаӡо. Ари зҵаарак мацара акәӡам араҟа еицраҧшьу рацәоуп. Уи аинвалидцәа ртәанчахәы аиура, ахәшәқәа рыла реиқәыршәара, апротезқәа рыҟаҵара уҳәа.

Аветеранцәа ирырҭо ацхыраара далацәажәо, Аҟәа ақалалқь ахада Адгәыр Ҳаразиа иҳәеит, жәымзы ирылагӡаны жәафҩык иреиҳаны ишрыцхрааз. Аха, иазгәеиҭеит, еиҳа еиҕьны ишиҧхьаӡо аусурақәа ирыхҭнырҵо аҧарақәа аинвалидцәа рфонд мамзаргьы ҷыдала аинвалидцәа ацхыраара рызҭо аминистрраҿы иҟаны, уаантәи ирзеихыршозар.

Хазы иалацәажәан аветеранцәа апротезқәа рыла реиқәыршәара азҵаарагьы. Аҳәынҭқарра Ахада иҳәеит, аҵыхәтәантәи аамҭазы уи аҟаҵара ауадаҩрақәа ацуп ҳәа шиаҳаз. Дҵааит, изыхҟьазеи ҳәа? Ишеилкаахаз ала, уаанӡа зтехнологиақәа рыла аус зуаз Германиатәи афирма «Отто БОКС» аҽамадара маҷк ауадаҩрақәа ацуп, аха ицәырҵыз азҵаарақәа раҧырҟәҟәааразы агәабзиарахьчара аминистрра  аиҿцәажәарақәа мҩаҧнагоит. Убри аан Рауль Ҳаџьымба аиҳабыра рхаҭарнакцәа адҵа риҭеит, декабр жәабанӡа алкаақәа ҟаҵаны, азҵаара аӡбара азнеишьа амҩақәа ылырхырц. Уи азы  аус иалахәу аусбарҭақәеи аминистррақәеи русура ҳәаақәырҵар ауп, аимадара рыбжьарҵар ахәҭоуп, ҳәа азгәеиҭеит иара.

Елана Лашәриа, Беслан Џьынџьал, АТ.

Оцените новость:
+1
+2
+3
+4
+5

Сохраните ссылку или поделитесь с друзьями

Возврат к списку

 
Последние события
15
Ари атема иазкны анҵамҭа аззырхиоз ҳкорреспондент, дазымхәыцкәа лхы иалырхәаз архивтә кадрқәа, ашкол анҭыҵ иҭыхыз ракәын.
17
Лыхнашҭа ауааҧсыра рацәан. Зехьынџьара еиҿкаан еиуеиҧшымыз ажәытә хәмаррақәа.
23
Ари ацәыргақәҵаҿы асахьақәа ахәшьара рырҭон зҧышәа ҳараку асахьаҭыхҩцәа.
31
Урҭ рҟны еуеиҧшым атемақәа ирылацәажәон Аҧсныи Урыстәылеи рхаҭарнакцәа .
Алаҳәарақәеи адныҳәаларақәеи
АГТРК