Фазиль Искандер ихьӡ анаунагӡатәразы аҳәынҭқарратә комиссиа аилатәара мҩаҧысит.

29.11.2016
813

Ашәҟәаҩҩы ду Фазиль Искандер ихьӡ анаунагӡатәраз иҟаҵатәу  аусқәа ирылацажәан Аҧсны Ахада иабжьгарала  иаҧҵоу аҳәынҭқарратә комиссиа аилатәараҿы. Фазиль Искандер иҩымҭақәа реиҭагара, анаҩс рҭыжьра, дахьиз Чагьам аҩны амузеи аиҿкаара, ибаҟа ақәыргылара  уҳәа ирылацәажәан азҵаарқәа жәпакы. Иҟаҵан ажәалагалақәа маҷымкəа   акомиссиа  алахәылацәа рҟнытә.

Еицырдыруа  ашәҟәыҩҩы ду,  аклассик, заҧҵамҭақәа   ирыбзоураны  Аҧсны ахьӡ адунеи иахыҵәаз Фазиль Искандер ихьӡ анаунагӡатәраз ишьақәыргылоуп аплан имҩаҧгатәу аусурақәа рзы.  Раҧхьа инаргылан иахәҭоуп ҳәа иҧхьаӡоуп аҳҭнықалақь амҩадуқәа руак ашәҟәыҩҩ  ихьӡ ахҵара, аха иарбан акомиссиа макьана ишьақәнамыргылац, уи азҵаара ӡбамкәа иаанхоит. Иалацәажәан иара убас,  Фазиль Искандер ибаҟеи амемориалтә ҕәыи ашьақәыргылара. Ашәыҟәыҩҩ Аҟәа дахьынхоз аҩнаҿы ишьақәыргылахоит амемориалтә ҕәы, абаҟа акәзар иахьыргылахо аҭыҧ макьана иазыҧшаам. Акомиссиа алахәылацәа иахәҭаны ирыҧхьаӡоит  ауаа рацәа  зҭаауа  аҭыҧ      азалхара. Аҧсны ахада иабжьгаҩ Владимир Занҭариа иҳәеит, ашәҟәыҩҩ диижьҭеи  ҧшьынҩажәи жәаба шықәса  аҵра  аназгәарҭо аамҭазы, иҩымҭақәа аҧсшәахь  еиҭаганы аҭыжьра    алыршара  шеихьӡара духо.

Аҧснытәи аҳәынҭқарратә университет аректор Алеко Гәарамиа иахәҭаны иҧхьаӡоит, Фазиль Искандер идҳәалоу аҭыҧқәа рыла аекскурсиақәа реиҿкаара. Иҳәеит, аунивеситет аҿы ишеиҿкаахо аконференциа
Аҟәа ақалақь ахада Адгәыр Ҳаразиа иҟаиҵеит ажәалагала, Фазиль Искандер иҩымҭақәа рфырхацәа    ахьынтәаауа  Чагьам амузеи   аҧҵазарц.

Ажурнал «Алашара» аредактор хада Анатоли Лагәлаа иҳәеит, аҧсуа шәҟәыҩҩцәа шазыхиоу  Фазиль Искандер иҩымҭақәа аҧсышәала ицәажәартә еиҧш аҟаҵара. Ажурнал «Алашара» ҭыжьымҭак  ашәыҟәыҩҩ ду, апоет изкхоит, еиҭагоу аусумҭақәа шмаҷугьы иҟоуп акьыҧхьымҭақәа рацәаны Фазиль Искандер изкны.
Аҧсуа  аҳәынҭқарратә  телерадиоеилахәыра адиректор хада   Ҭали Џьапуа  иазгәалҭеит,   Чагьам ашәҟәыҩҩ иҩны амузеи аиҿкаара аинтерес зҵоу ажәалагаланы ишылыҧхьаӡоу . Фазиль Искандер иҩымҭақәа реиҭагара аус хшыҩзышьҭара зҭатәу ак акәны илыҧхьаӡоит.

Иара  убас,  Ҭали Џьапуа  иазгәалҭеит, ашәҟәыҩҩ ихьӡ иадҳәаланы имҩаҧгахо аусмҩаҧгатәқәа зегьы телехәаҧшрала  арбара ишазыхиоу.

Аҧсны аҵареи аҭҵаарадырреи рминистр Адгәыр Какоба иҳәеит, есышықәса аминистрра еиҿнакаауа аҭҵааратә усурақәа рконкурс «Акалам аҧышәара» ашәҟәыҩҩ ихьӡ шахҵахо. Ҳаҧхьаҟазы иазгәаҭоуп  Фазиль Искандер  иҩымҭақәа реиҭага ашколтә апрограмма алаҵара.
Ателеканал «Абаза» адиректор хада Руслан Ҳашыг ажәалагала ҟаиҵеит, Фазиль Искандер ихьӡ зху арҿиаратә центр  аҧҵазарц.

Иааидкылан,  акомиссиа алахәылацәа Фазиль Искандер ихьӡ анаунагӡатәраз ирыдгалаз аплан шьақәдырҕәҕәеит. Ицәырҵыз азҵаарқәа аус рыдулахоит егьырҭ аилатәарақәа раан.

Альбина Жьиҧҳа, Ельдар Дамиров ,АТ


Оцените новость:
+1
+2
+3
+4
+5

Сохраните ссылку или поделитесь с друзьями

Возврат к списку

 
Последние события
8
Аизара аҟны Аҧсны арратәи аполитикатәи ҧсҭазаараҿы зџьабаа акыр идууз, зыдунеи зыҧсаххьоу иранашьан "Аиааиразы"амедал.
47
Аҭыжьымҭаҿы:Аныҳәатә мшқәа рзы ашәарҭадара аиҿкааразы. Атәыла азинхьчаратә усбарҭақәа рхаҭарнакцәа абрифинг мҩаҧыргеит.
Алаҳәарақәеи адныҳәаларақәеи
АГТРК