Очамчыра араион Лашькьындар ақыҭан иаадыртит еицырдыруа аибашьҩы, Аҧсны Афырхаҵа Мушьни Хәарцкьиа ибаҟа.

06.12.2016
859

Очамчыра араион Лашькьындар ақыҭан иаадыртит еицырдыруа аибашьҩы, Аҧсны Афырхаҵа Мушьни Хәарцкьиа ибаҟа. Иара фырхаҵарыла ари аҭыҧаҿы дҭахеит декабр фба, 1992 шықәса рзы. Абаҟа ықәргылан Очамчыра араион ахадареи Лашькьындар ақыҭа анапхгареи рымчала.

Мушьни Хәарцкьиа дыруаӡәкын Аҧсны апатриотцәа. Иара иҧсадгьыл ахь имаз абзиабара ҳәаак амамызт. Амилаҭтә - хақәиҭратә қәҧара аҧхьагылаҩцәа дреиуан. Ҧсабарала акыр иҟәыҕаз аҵарауаҩ идыруан ақырҭцәа рыгәҭакқәа . Мушьни дыздыруаз зегьы гәыҩбара рымамызт аибашьра иалагар абџьар шьҭызхуаз раҧхьа дышгылаз. Ус иагьыҟалеит. Аҧсны Аџьынџьтәылатә еибашьра аҧхьатәи амшқәа инадыркны Мушьни Хәарцкьиа ампыҵахалаҩцәа рҿагылара еиҿызкаауаз аибашьцәа дыруаӡәкын . Раҧхьа иара напхгара аиҭон адҵа ҷыдақәа назыгӡоз хазы игоу абаталион. Анаҩс, Аҧсны Иреиҳаӡоу Асовет ахантәаҩы Владислав Арӡынба Иуҧсҟа инамаданы, Гәымсҭатәи ахырҕәҕәарҭа акомандаҟаҵаҩыс даҭан.

Иазгәаҭатәуп, Мушьни Хәарцкьиа аибашьра аҧышәа шимаз. Иара аибашьра аҧхьа еиҿкааз Аҧсуа гвардиа акомандаҟаҵаҩцәа дыруаӡәкын. Мушьни Хәарцкьиа инапхгарала Гәымсҭатәи ахырхарҭаҿы лыҵшәа бзиала иакымкәа ажәыларақәа мҩаҧган. 1992 шықәса октиабр мзазы Мушьни Хәарцкьиа дрышьҭит Аҧсны Мрагыларахьтәи ахәҭахьы. Ноиабр мза анҵәамҭазы далахәын Кәачара ақыҭа ахақәиҭтәразы қәҿиарала имҩаҧгаз ажәылара. Анаҩс аҧсуа еибашьцәа ахырҕәҕәарҭа ааныркылеит Лашькьындар ақыҭа. 

Декабр фба 1992 шықәсазы, ақырҭцәа мҽхакы ҭбаала ажәылара мҩаҧыргеит. Ақыҭа ахәы ҳаракырақәа руак аҭарцәраан фырхаҵарыда дҭахеит Аҧсны аҵеи лаша Мушьни Хәарцкьиа. Мушьни Хәарцкьиа данҭахаз амш аҽны Очамчыра араион Лашькьындар ақыҭа иаадыртит иара ибаҟа . Мушьни Хәарцкьиа дыргәаладыршәарц арахь имҩахыҵит аибашьҩы гәымшәа иуацәа, иҩызцәа, ицеибашьуаз. Мушьни Хәарцкьиа данҭаха ашьҭахь ихҵоуп Аҧсны Афырхаҵа ҳәа ахьӡ ҳаракы. Иара дыздыруаз зегьы ргәалашәараҿы аҧсадгьыл ахьчаҩ наунагӡа хашҭра иқәымкәа даанхоит. 

А.Корсаиа, А. Маланиа,АТ

Оцените новость:
+1
+2
+3
+4
+5

Сохраните ссылку или поделитесь с друзьями

Возврат к списку

 
Последние события
163
Аҭыжьымҭаҿы:Данҭаха ашьҭахь ҩажәи хәба шықәса рнаҩс. Ахьӡ-аҧша апарк аҿы анышә дамардеит Аҧсны Афырхаҵа Ирина Гоцериӡе.
163
Аҟәа араион Иашҭхәа ақыҭан инхо ауааҧсыра хымыз инареиҳаны ӡыда иҟан, аӡынашьҭыгақәа ахьыблыз иахҟьаны.
51
Аусурақәа мҩаҧнагон аҳәынҭқарратә еилахәыра «Аҧснымашьынамҩа».
Алаҳәарақәеи адныҳәаларақәеи
АГТРК