Имҩаҧысит Аҧсны аҳəынҭқарра Ахада Р. Ҳаџьымбеи Ауаажəларратə Палата алахəылацəеи реиҧылара.

07.12.2016
732

Ареспублика  аҩныҵҟа-политикатә ҭагылазаашьа,    аекономика  арҿиара,    амилаҭ  рҵас, рқьабз реиқәырхара  уҳәа    азҵаарақәа жәпакы ирылацәажәеит Аҧсны  Ахада   Рауль Ҳаџьымбеи,  Ауаажәларратә Палата  алахәылацәеи    реиҧылараан.  

Сақәгәыӷуеит иахьатәи ҳаиҧылараҿы иҳалшап ҳәа   гәаартыла аицәажәара, иҳәеит Аҧсны Ахада Рауль Ҳаџьымба, Ауаажәларратә Палата аилазаара ҿыц шьақәгылеижьҭеи уи алахәылацәеи иареи раҧхьатәи реиҧылараҿы. Иазгәеиҭеит, Ауаажәларратә Палата анапынҵа хадақәа амоуп ҳәа иҧхьаӡаны  Аҧсны аиҳабыра уи аусура еснагь адгылара шарҭо. Иаликааит апалата ахаҭарнакцәа гәцаракра арҭар ауп ҳәа ииаҧхьаӡо азҵаарақәа.

Убри аан, Ауаажәларратә Палата ахантәаҩы Наҭела Акаба илҳәеит, аҳәынҭқарра аҩныҵҟа имҩаҧысуа аполитикатә хҭысқәа ажәлар зегь агәҭынчымра шрызцәырнаго. Инаҵшьны иазгәалҭеит, Апалата алахәылацәа ирылшо зегьы шыҟарҵо абжьаҟазаразы, убри ала  маҷк иадымхаргьы, аҭагылазаашьа аиӷьтәразы. Усҟан Рауль Ҳаџьымба иҳәеит, зегьы ргәы иақәшәо аҟаҵара шыуадаҩу. Аҧсны Ахада иажәақәа рыла, уажәааигәа Жәлар Реизараҿы Ахылаҧшратә палата адепутатцәа ирыднагалаз, имҩаҧгаз агәаҭарақәа рылҵшәақәа рҿы излацәажәоз миллиардк инарзынаҧшуа аҧарақәа рызҵаара шышьҭыхыз Аҧсны анапхгара рыдҵала. Аҳәынҭқарра аҧарақәа изызку ирықәхарџьзар ауп.

Аиҧылараҿы иззааҭгылаз азҵаарақәа иреиуан арҩашьыгатә маҭәашьарқәа Аҧсныҟа рҭагалара алмыршареи, урҭ рыдкылара аҿагылареи рзы иҟаҵатәу. Иазгәаҭан анаркоманиа есааира ишҿахо, анаркотикқәа здызкыло рыбжьара ишыҟоу зынӡа иқәыҧшӡоу, уи ҳмилаҭ рҧеиҧш  ашәарҭара ишҭанаргыло. Убри аан, аҳәанҭқарра Ахада иазгәеиҭеит,  уала-ҭахыла акәымкәа, азакуан еилазгаз ишахәҭоу ала ахара шрыдҵатәу. Рауль Ҳаџьымба иажәақәа рыла,  аҿар аус рыдулалатәуп, урҭ амҩа раныгаразы ирзаҧҵатәуп иреиҳау аҵараиурҭа, анаҩс усурҭа ҭыҧла уадаҩрада реиқәыршәаразы алшарақәа.Аҳәаанырцә аҵара зҵо аҿар Аҧсныҟа иргьежьлатәуп. Ари азҵаара мҽхакыҭбаала иазнеитәуп.

Иалацәажәан аҭаацәара қәыҧшқәеи, қьырала ауадақәа ирыҩноу аибашьра ааха зманы иалҵыз  аветеранцәа рыхшареи нхарҭа ҭыҧла реиқәыршәара атәгьы. Азҵаара аҭак ҟаҵо Рауль Ҳаџьымба иҳәеит,  уи аиҳабыра рҿаҧхьа иқәгылоу зыӡбара хымҧадатәу ишреиуоу. Иазҧхьагәаҭатәуп аҩнеихагылақәа рыргылара, иҳәеит Рауль Ҳаџьымба. Ауаажәларратә Палата алахәыла Рита Лолуа Аҧсны Ахада диазҵааит аихамҩа аиҭашьақәыргыларазы ҳтәыла иақәу ҩ-миллиардк акредит хықәкыла уи ишақәхарџьыз ӡәыр игәеиҭахьоума ҳәа? Лара илҳәеит, аихамҩа аиҭашьақәыргылара уиаҟара ахҭынҵаӡамызт ҳәа шылыҧхьаӡо. “Аспециалистцәа ражәақәа рыла, инагӡоу аусурақәа 800 миллион мааҭ рҟынӡа ауп иахьынаӡо”,- лҳәеит лара.

Аиҧылараҿы апалата алахәылацәа  злацәажәаз иреиуахеит    аибашьра аветеранцәа ҷыдалатәи агәцаракра рыҭаразы иҟаҵатәу, иара убас адгьылқәа реихшара азҵаарагьы.

Аиҧылараҿы ирзааҭгылан аполитикатә партиа датәуп, мамзаргьы аҳәынҭқарра анапхгара имҩаҧырго аполитикатә хырхарҭа дадгылоит, ҳәа еилых ҟамҵакәа аҳәынҭқарратә телехәаҧшрахьы ишааҧхьалатәу ргәаанагарақәа рҳәарц азы. Ауаажәларратә Палата алахәыла Оҭар Лакрба иажәақәа рыла, аҵыхәтәантәи аамҭазы ателехәаҧшраҿы аҭагылазаашьа еиҳа еиӷьхеит, аха аредакциатә политика иҵегь  аус адулатәуп, уи ажәлар ирымоу аинформациатә ҭахрақәа иҵегь ирықәшәо иҟаҵатәуп ҳәа иҧхьаӡоит.

Аиҧылараҿы ирылацәажәан ақыҭақәа рҿы инхо ауааҧсыра рхыҧхьаӡара еиҵахо ишалагаз, аҧсуа бызшәа аҭагылазаашьа,аҧсуаа еснагь ирымаз аха аҵыхәтәантәи аамҭазы зҵакы хьысҳахаз апатуеиқәҵара, аибачҳара, арыцҳеибашьара.

Аиҧылара цон ҩ- сааҭк инарзынаҧшуа. Уи хыркәшо, Аҧсны Ахада Рауль Ҳаџьымба иҳәеит, асеиҧш аицәажәарақәа анаҩсгьы ишеиҿкаалатәу. Урҭ ишалдыршо азҵаарақәа жәпакы рыӡбара.

Елана Лашәриа, Алықьса Агәхаа,Ҭемыр Гогохьиа,АТ.



Оцените новость:
+1
+2
+3
+4
+5

Сохраните ссылку или поделитесь с друзьями

Возврат к списку

 
Последние события
20 Ииун 2018
79
Аҭыжьымҭаҿы:Аиубилеитә рыцхәқәа рымҩаҧгара аҽазыҟаҵара иазкны Аҧсны Ахада аилацәажәара мҩаҧигеит.
20 Ииун 2018
49
Убри азы аӡбамҭа идикылеит Аҧсны аҵареи аҭҵаарадырреи рминистр Адгәыр Какоба.
20 Ииун 2018
77
Урҭ аҭыҧқәа ргәаҭаразы дырҭааит аҳҭнықалақь ахада Адгәыр Ҳаразиа.
20 Ииун 2018
45
Ҷыдала иаҧҵаз аусуҩтә гәыҧ ари азҵаара анҭырҵаа, еилкаахеит Аҧсны атәылауаа рзинқәа реилагара аҭыҧ шамоу.
20 Ииун 2018
49
Убас,. Гагра араион Алаҳаӡыхь ақыҭаҿы иҟоу агәамеизгарҭа ауадаҩрақәа акыр рызцәырнагоит ааигәа инхо ауааҧсыра.
Загрузка плеера
Алаҳәарақәеи адныҳәаларақәеи
АГТРК