Аҧсны аҳəынҭқарра Ахада Рауль Ҳаџьымба ипресс-конференциа.

27.12.2016
937

Иҳаҩсуа ашықәсазы имҩаҧгаз аусура   алыҵшәақәа еихишьаалеит     Аҧсны Ахада Рауль Ҳаџьымба амассатә информациа ахархәагақәа рхаҭарнакцәа рзы имҩаҧигаз апресс-конференциаҿы.   Атәыла  адәныҟатәи аҩныҵҟатәи аполитика аҿиашьа, аҧсуа бызшәа аҭагылазаашьа,  агәабазиарахьчара ашьҭыхра уҳәа азҵаарақәа жәпакы рҭак ҟаиҵеит аҳәынҭқарра Ахада.     Апресс - конференциа мҩаҧысуан сааҭк инеиҳаны.

“Иаартны аицәажәара сазыхиоуп,” -иҳәеит Аҧсны Ахада Рауль Ҳаџьымба ашықәс аихшьаалақәа ирызкны имҩаҧысуаз апресс- конференциа аартуа. Ажурналистцәа азҵаарақәа рыҭирахьы ииасаанӡа, аҳәынҭқарра Ахада иазгәеиҭеит ҩнызқьи жәафтәи ашықәс ҳтәылазы ишымариамыз. Уи аҩныҵҟатәи аполитика аганахь мацара акәӡам, аекономика ахырхарҭа алагьы.

Аҧсны Ахада иара убасгьы иҳәеит, ишымариамызгьы аекономикаҿы аихьӡарақәа шырацәоу. Урҭ ируакуп аказначеитә системахь аиасра. Рауль Ҳаџьымба иазгәеиҭеит, ахатәы биуџьет хә-миллиардк рҿынӡа ишьышьҭыху. Ҩнызқьи жәаф шықәса рзы ирацәан иҟаҵаз, абанктә система лҵшәабизалатәи аларҵәара, иалагалаз абанктә маҵзурақәа рышьақәырҕәҕәара. Урҭ иреиуоуп ахархәаратә кредитқәа, аҧара еикәаршаратә карта “Аҧра” ала ауааҧсыра реиқәыршәара. Аихьӡарақәа ыҟан  атауар еикәыршара аганахь алагьы, уи иаанаго ахашәала ҩнызқьи жәаф шықәса рзы акырынтә ишьҭыҵит ҳәа ауп. Аҳәынҭқарратә биуџьет иаланагалаз аҧарақәа ракәзар, уи ҩ -миллиардки бжаки артәеит.

Аҧсны Ахада иажәақәа рыла, аҳәынҭқарра ахадара рзы ихымҧадатәу азҵаарақәа иреиуоуп ақыҭанхамҩа ашьҭыхра. Анхацәа рҭагылазаашьа маҷк иадымхаргьы ацхраара хықәкыс иҟаҵаны, Аҧсны араионқәа рқыҭақәа рҿы ихацыркын амҩақәа реиҭашьқәыргылара, ӡыла ақыҭақәа реиқәыршәаразы  аӡымҩанганақәа рышьҭаҵара. Аҳәынҭқарра Ахада лымкаала дазааҭгылеит аенергетика аҭагылазаашьа. Рауль Ҳаџьымба иҳәеит, уи шыуашәшәыроу. Убри аан иазгәеиҭеит, ауадаҩрақәа шцәырнагоу  ауааҧсыра афымцалашара ахә ахьахырымшәаауагьы.

Анаҩс ииасын азҵаарақәа рахь. Раҧхьа урҭ рҭиуан аҳәынҭқарратә бызшәала аус зуа ажурналистцәа. Актәи азҵаарагьы зызкыз аҧсшәа аҭагылазаашьа акәын. Рауль Ҳаџьымба иҳәеит, уи аҧеиҧш бзиа амоуп ҳәа шыиҧхьаӡо.

Аҧсуа ҳәынҭқарратә телерадиоеилахәыра адиректор хада Ҭали Џьапуаҧҳа лызҵаара азкын ашықәс аҩныҵҟа имҩаҧысуаз ахҭысқәа рҟынтә аҳәынҭқарра Ахада ихадоу ҳәа урҭ рахьтә иаликаауаа. Уи аҭак ҟаҵо Рауль Ҳаџьымба иазгәаиҭеит.

Ажурналистцәа зызҿлымҳаз иреиуахеит  мызқәык рыла  имҩаҧысраны иҟоу апарламенттә алхрақәа ирызкыз азҵаарагьы. Аҳәынҭкарра , мамзаргьы азакуанҧҵара аганахь ала аусура зынӡа зҽалызмырхәуа  адепутатцәагьы ыҟоуп. Ажәлар иалырхыз ауаҩы игәра згаз, ринтересқәа ихьчозар ауп, дахьнеиз аҭыҧ аҿы акәзар,  иус қәнагала дазнеир ахәҭоуп, иҳәеит Аҧсны Ахада.

Атема иацҵо, Аҧсны Ахада Жәлар Реизара иазкны азҵаара иҭан.  Ашьауӷатә усҭҵаара зганахь иахацырку ауаа апарламент ахь рнеира абанӡаиашоу, насгьы уи алмыршаразы иҟаҵатәузеи,  ҳәа иқәыргылаз азҵаара аҭак ҟаҵо Рауль Ҳаџьымба иҳәеит, алхрақәа рзы Аҧсны Аконституциатә закуан аҧсахрақәа шалагалаз. Урҭ инарықәыршәаны, ацәгьаура азы зус хацырку ауаа азин рымаӡам алхрақәа рылахәхара.

Ажурналистцәа ирҭииз азҵаарақәа рыбжьара иҟан декабр жәохә азы имҩаҧысуаз ахҭысқәеи, лҵшәак аҳасаб ала аиҳабыреи аоппозицеи ирыбжьарҵаз аиқәшаҳаҭра, Аҧсны Урыстәыла аҿаҧхьа иақәу ауал уҳәа. Ауал азҵаара дазааҭгыло Рауль Ҳаџьымба иҳәеит, аҵыхәтәантәи ҩышықәса рыҩныҵҟа иргьежьыз аҧарақәа рыла Аҧсны иҟауҵашаз шырацәоу, насгьы урҭ аиҭкарақәа ауааҧсыра рыҧсҭазаара анырра шрырҭоз.

Акыр ирацәан азҵаарақәа, дара рыбжьара иҟан Женеватәи аиҿцәажәарақәа, Гал араион ауааҧсыра тәылауаҩшәҟәыла реиқәыршәара, агәабзиарахьчара аминистрра аусура уҳәа лассы-лассы ишьҭыҵуа атемақәа. Ҷыдала иазааҭгылан, уажә ааигәа Аҟәатәи ахшараиурҭаҿы аҧшқа иҧсҭазаара иалҵра атәгьы. Аҭакзыҧхықәу ахшараиурҭа аусзуҩцәа рганахь ала  иҟаҵои ҳәа азҵаара ықәыргылан. Рауль Ҳаџьымба иажәақәа рыла,  агәабзиарахьчра аминистрраҿы имҩаҧысыз аколлегиаҿы иҟаҵаз авбақәа акгьы рзыӡбаӡом.  Ашықәс ҿыц инаркны уи аӡбара напы аҳаркуеит, иҳәеит Аҧсны Ахада. Убри аан иазгәеиҭеит ,ахшараиурҭатә ҩны анапхгара ҿыц шахаргылахо. Ацитрустә сезон, анаркоманиа, амҩатә машәырқәа раанкылара, Аҧсни Қырҭтәылеи рҳәааҿы аҭагылазаашьа зеиҧшроу уҳәа ажурналистцәа рызҵаарақәа нҵәаӡомызт. Аҧсуа-қырҭуатә ҳәаа далацәажәо, Рауль Ҳаџьымба иҳәеит, иаркыз агәаҭарҭатә-аушьҭырҭатә пунктқәа рҭагылазаашьа ахылаҧшраҿы алшарақәа шеиҕьыртәыз.

Апресс-конференциаҿы иззааҭгылаз азҵаарақәа зегьы ҳтәылазы аҵак ду рымоуп. Аҳәынҭқарра ахадеи амассатә информациа ахархәагақәа рхаҭарнакцәеи реиҧылара мҩаҧысуан ҩ-сааҭк инарзынаҧшуа. Ажурналистцәа ирҭииз азҵаарақәа зегьы рҭак инҭырҳәацааны иҟаҵан. Апресс- конференциа хырқәшо, Аҧсны Ахада иҳәеит, асеиҧш аиҧыларақәа анаҩсгьы ишеиҿкаахало атәы. Рауль Ҳаџьымба иааиуа Ашықәс Ҿыц зегьы ирыдиныҳәалеит.

Елана Лашәриа, Саид Агәхаа, АТ.

Оцените новость:
+1
+2
+3
+4
+5

Сохраните ссылку или поделитесь с друзьями

Возврат к списку

 
Последние события
3
Аҭыжьымҭаҿы: Акурорттә сезон  аихшьаалақәа рзы. Аҧсны  Ахада  дидикылеит акурортқәеи атуризми рзы    аминистр.
5
Борис  Гәыргәылиа ишәҟәы ахҧатәи атоми , иара иҷкәын изку  ашҟәы  «Абзагәи ».
8
Ҟрымтәи асасцәа рныҟәара хацдыркит  Аҟәатәи  ахшаалыҵ зауад ала.  
6
Иара Ахада изеиҭеиҳәеит, ҳазну ашықәс ноиабр акынӡа ареспублика ишаҭааз миллионҩык рҟынӡа аҧсшьаҩцәеи атуристцәеи.
41
Аҭыжьымҭаҿы:Ахырхарҭақәа жәпакы рҟны аусеицуразы еиқәышаҳаҭхеит. Аҧсныи Ҟрыми реиҳабырабжьаратә комиссиақәа актәи реилатәара.
48
Иара Аҧсны амилаҭтә олимпиатә еилакы аҿы  адныҳәаларақәа идикылон
Алаҳәарақәеи адныҳәаларақәеи
АГТРК