Аҧснытәи аҳәынҭқарратә университет афилологиатә факультет аусзуҩцәа гәыҧҩык ааигәа Ҭырқәтәылантә ихынҳәит.

10.02.2017
707

Аҧснытәи аҳәынҭқарратә университет афилологиатә факультет аусзуҩцәа гәыҧҩык   ааигәа Ҭырқәтәылантә   ихынҳәит.  Урҭ    уахь   рцара  хықәкыс иаман ҳџьынџьуаа рыбжьара аҧсуа бызшәазы аҭагылазаашьа зеиҧшроу аилкаара, иара убас ҳтәыла иреиҳаӡоу аҵараиурҭа аҿар радыҧхьалара.  

Ишдыру еиҧш, Ҭырқәтәыла инхоит хыҧхьаӡара рацәала ҳџьынџьуаа. Урҭ рыҧсадгьыл ахь рырхынҳәразы ҳтәылаҿы аус ауеит аҳәынҭқарратә программа, Ҭыркәтәыла инхои Аҧсны иҟоу аҧсуааи ирыбжьоуп аимадара, уи еснагь аҽарҭбаауеит. Ҩаҧхьа ҿыц аизыҟазаашьақәа рырҕәҕәаразы, анаҩс Ҭыркәтәыла инхо аҿар Аҧсныҟа радыҧхьаларазы Афилологиатә факультет аусзуҩцәа Арда Ашәба, Баҭал Ҳагәышь, Оҭар Ӡиӡариа, Диана Џьынџьал жәамш инарзынаҧшуа Ҭырқәтәыла иҟан.

Диана Аџьынџьал иазгәалҭоит, уаҟа инхо аиҳабыратә абиҧара рыҧсадгьыл  ахь ирымоу агәыбылра шырныҧшуа, аҧсуа бызшәагьы еиқәырханы ишрымоу, аха изызҳауа аҿар уи ала ицәажәом, лассы-лассы аиҭанеиааира ҳабжьазҭгьы, абызшәа иадҳәалоу ауадаҩрақәа ӡбазҭгьы иалыршахон аҿар рабацәа рыдгьыл ахь рхьарҧшра, – азгәалҭоит ауниверситет аҧсуа литература акафедра аиҳабы.

Аҧснынтәи асасцәа Ҭырқәтәыла раҟазаара актәи амш аҽны  идырбан ҳаҧхьаҟа  Аҧсуа центр ахьыргылахо аҭыҧ, ҳџьынџьуаа зегьы ироуеит алшара араҟа еиуеиҧшым аусмҩаҧгатәқәа реиҿкаара, уи ахҭыс акыррамҭа иззыҧшыз ак ауп. Диана Џьынџьал илҳәеит, иаарласны аҧсуа литература акафедра ишаиуа ҳџьынџьуаа рыҧсҭазаара атәы зҳәо аинтерес зҵо ахҭысқәа рыла ишьақәгылоу Маҳинур Папҧҳа лдиссертациатә усумҭа.  

Ҳтәыла иреиҳаӡоу аҵараиурҭа аҧсуа бызшәа акафедра аиҳабы Оҭар Ӡиӡариа иҳәеит, жәаба жәохә шықәса рышьҭахь Ҭырқәтәыла аҧсышәала ицәажәо ҳџьынџьуаа ҟамлар шалшо, ари иаарласны зыӡбара аҭаху зҵаароуп , азгәаиҭеит иара.

Аҳәынҭқарратә университет ахатә  зеиҧштә нхарҭа ҿыц аиҭашьақәыргылара ашьҭахь иҟоуп алашара  Ҭырқәтәыла иҟоу аҿар ара аҵара рҵартә еиҧш аҟаҵара.Оҭар Ӡиӡариа  уи абызшәа аиқәырхаразы иҟаҵатәу ак акәны иҧхьаӡоит.

Аҧснытәи аҳәынҭқарратә университети Ҭырқәтәылатәи аҵариурҭақәеи ирыбжьоу аиқәышаҳаҭрақәа ирыбзоураны, иалыршоуп аҿар аҩ-ҳәынҭқаррак рҿы аҵара рҵалартә. Аҧсуа хәыҷқәа уаҟа рдыррақәа реизырҳара иалнаршоит Аҧсны аҭоурых иазку архивтә материалқәа рыҭҵаара, ааигәа ишьҭыхын азҵаара Ҭырқәтәылатәи ауниверситетқәа руак аҿы аҧсуа кафедра аартра, аха Қырҭтәыла имҩаҧнаго  аполитика иахҟьаны уи залмыршахеит.

Ҭырқәтәыла иҟоу аҿар ласы-лассы ирызцәырҵуаз зҵаараны иҟан  Аҧснытәи аҳәынҭқаратә университет адиплом азхаҵара ахьынӡамоу. Диана Џьынџьалҧҳа илҳәеит, иахьазы Урыстәыла  ишцо аиҿцәажәарақәа ҳмилаҭтә ҵараиурҭа адиплом аҳәаанырцә азхаҵара аиуртә еиҧш аҟаҵара, уи аналыршаха аҿар уадаҩрада  аусурҭа аҧшаара рылшоит. Ари еиҭахгьы Аҧсныҟа разхьарҧшразы ихәарҭоу усхон.  
  
Ауниверситет аусзуҩцәа уа рыҟазаара аамҭа иалагӡаны, ирылшеит хәы змаӡам  афольклортә нҵамҭақәа рҭаҩра, уи аус еиҭа иацҵатәуп – иазгәарҭон арҵаҩцәа, -   мап анакәха  иҭҵаамкәа иҟоу  аматериалқәа  ыӡыр ауеит. Ҳтәыла иреиҳаӡоу аҵараиурҭа арҵаҩцәа еицҿакны иазгәарҭон, хара имгакәа аус зыдуалатәу шырацәоу, уи ҳаҧхьаҟа аҧсуа  абызшәа аиқәырхара ишацхраауаз.

Альбина Жьиҧҳа, Саид Агәхаа ,АТ



Оцените новость:
+1
+2
+3
+4
+5

Сохраните ссылку или поделитесь с друзьями

Возврат к списку

 
Последние события
Алаҳәарақәеи адныҳәаларақәеи
АГТРК