Ақәра ду нызҵхьоу ауаа рыла еснагь ибеиан Аҧсны.

22.02.2017
645

Ақәра ду нызҵхьоу ауаа рыла еснагь ибеиан Аҧсны. Иахьагьы урҭ рхыҧхьаӡара маҷӡам.  Арҭ амшқәа рзы шәышықәса лхыҵит Наҭелла Аҩӡба-Амҷба. Лара аҧсҭазаараҿы акыр амыҟәмабарақәа лхылгахьеит, дшыхәыҷӡаз деиҭымхеит. Аҭаацәара даналалагьы агәаҟра рацәа лхылгеит, илыҧхеит хҩык ахшара. Аҧсны Жәлар Аџьынџьтәылатә еибашьраан иҭахеит лмаҭа Алмасхан Амҷбеи, лыҷкәын ишьа лурц аибашьра ицаз лҭаца Нелли Ҧацациа-Амҷбеи. Наҭелла Аҩӡба –Амҷба иагьа рыцҳара лхылгазаргьы, агәырҩа лҽалымҭеит. Абырг лиубилеи лыдырныҳәаларц азы илҭааит анацәа рхеилак Аҟәатәи аҟәша ахаҭарнакцәа.

Иуадаҩуп агәрагара, ари абырг шәышықәса лхыҵуеит ҳәа. Адныҳәаларақәа лыдкыло, лара ишылҟазшьоу еиҧш ажәа хаа  лыҧшаауеит зегьы рзы.   Наҭелла Аҩӡба аҧсҭазаара акыр дышкыднаҟьахьоугьы, дыџьбарамхаӡеит. Лара илҳәоит, лықәра  шлызгәамҭо, лыҧсҭазаара зегьы еимгеимцарак еиҧш ишымҩасыз. Абырг ибзианы илгәалашәоит лхәыҷра. Зынӡа дышмаҷӡаз рыҧсҭазаара иалҵуеит лани лаби.

Наҭелла Аҩӡба аҭаацәара далалоит Аџьынџьтәылатә еибашьра аан. Лыҧшәма Пиотр Амҷба иҭаацәа акыр агәаҟрақәа рхыргахьан, Асҭан захьӡыз аишьцәа руаӡәк  Аџьынџьтәылатә еибашьра ду аан хабарда дыӡхьан. Наҭелла Аҩӡбеи Пиотр Амҷбеи рҭаацәараҿы ииуеит жә-ҩык ахшара. Ҩыџьа еицииз зынӡа ишыҧшқацәаз рыҧсҭазаара иалҵит, анаҩс ан длыҧхоит ҧшьышықәса зхыҵуаз лыҧҳа хәыҷгьы. Наҭелла Лаки-иҧҳа  илааӡеит ф-ҩык ахшара, аҧеи хә-ҩы аҧҳацәеи.

Аҧсны Жәлар рџьынџьтәылатә еибашьраан, Наҭелла лмаҭа, зеижә шықәса зхыҵуаз Алмасхан Амҷба дҭахеит марттәи ажәылараҿы. Иара иҭахара ашьҭахь иан Нелли Ҧацациа-Амҷба лыҷкәын ишьа лурц дцоит еибашьра, дҭаблит Аҳбҩык иҭархаз аверталиот. Урҭ ргәалашәара хашҭра ақәӡам, ари аҭаацәара ду анааизо ицәырганы иеиҭарыхәаҧшуеит иахьа рааигәа иҟам ани аҧеи рфотосахьақәа. Алмасхан Амҷбеи, уи иан Нелли Ҧацациа-Амҷбеи  иранашьоуп Леон иорденқәа.

Аибашьра ашьҭахь акыр шықәсқәа рнаҩс ари аҩнаҭаҿы иҟалеит агәырҕьара. Ихигаз агәаҟра даиааины аҭаацәара ҿыц аҧызҵаз Владимир Амҷба  иҩанаҭаҿы диит аҵеи. Уи ихьӡырҵеит Асҭан. Иахьа иара  ажәеизатәи акласс аҿы дтәоуп. Шәышықәса зхыҵыз ианду Наҭелла илҳәоит, уи шиакәу лышықәсқәа ирыцызҵо.

Шәышықәса зхыҵыз абырг иазгәалҭоит лықәра амаӡа шамам. Лымкаала лхы дацклаҧшны ҳәа шылгәалымшәо. Аџьабаа лыман, аҭаацәара ду ныҟәгатәын, иааӡатәын ахшара. Агәырҩа ауаҩы даӡрыжәуеит, лҳәоит лара. Убри аан иазгәалҭоит, иахьа Анцәаишиҳәара дшыҟоу. Илҳәоит ахылаҧшра бзиа шлымоу, иҭабуп ҳәа лалҳәоит лҭаца Нелли, лара лоуп ахәышҭаара ахьҿымцәааз зыбзоуроу. Ачеиџьыка бзиа змоу, асасцәа згым Владимир Амҷба  иҭаацәара асеиҧш абырг-ахыбаҩ дахьрымоу насыҧны ирыҧхьаӡоит.

Елана Лашәриа, Беслан ЏЬынџьал, АТ.



Оцените новость:
+1
+2
+3
+4
+5

Сохраните ссылку или поделитесь с друзьями

Возврат к списку

 
Последние события
23 Ноиабр 2017
92
22 Ноиабр 2017
5
22 Ноиабр 2017
7
Ҿҳәарас иамазаауеит жәа-шықәса .
22 Ноиабр 2017
10
Абри атәы рҳәеит Аҧсны Амшынеиқәафымцамч иаҵанакуа афымцаҭиира аҟәша ахаҭаранакцәа.
21 Ноиабр 2017
148
Аҭыжьымҭаҿы:Афестиваль « КУНАКИ»   аусура  хнаркəшеит, аха  агран – при  занаршьаша   аусумҭа  ҳәа  акагьы  рзалымхит.
Загрузка плеера
Алаҳәарақәеи адныҳәаларақәеи
АГТРК