Аҧсны Аҭҵаарадыррақәа Ракадемиа иатәу агидрофизикатә институти аекологиа аинститути еидылоит.

14.03.2017
494

Аҧсны Аҭҵаарадыррақәа Ракадемиа иатәу агидрофизикатә институти аекологиа аинститути  еидылоит. Уи азы уажәы аҵыхәтәантәи анапаҵаҩрақәа мҩаҧысуеит. Аҭоурых ду змоу агидрофизикатә институт аҿы еиуеиҧшым аамҭақәа  рзы  имҩаҧыргон  жәларбжьаратәи  аҵакы  змаз аҧышәарақәа. Ари аҭыҧ аӡбахә иаҳахьан еицырдыруа амшынҭҵааҩ,  афранцыз Жак-Ив Кусто. Аха, Асовет мчраан зусура ҷыдалатәи ахылаҧшра змаз аинститут иара  ирбара мап ацәкын. Аинститут  иахьатәи  аусуреи, аҧсҭазаашьеи, аидылара ҵаҵҕәыс иамоуи еилылкаауан   Елана Лашәриа.

Х-гектрак адгьыл зҵазкуа Аҭҵаарадыррақәа Ракадемиа иатәу агидрофизикатә институт  аиҧш зеиҧшу аҧышәаратә институтқәа Асовет Еидгыла иахьаҵанакуаз акык-ҩбак роуп иҟаз. Ҩашьарада иуҳәар ауеит, ари иуникалтәқәоу рахь иаҵанакуеит ҳәа. Аибашьра ҟалаанӡа аҵарауаа мацара фышәҩык еидызкылоз аинститут аҿы имҩаҧыргон имаӡоу аҟазшьа змаз аҭҵаарақәа, иара убасгьы иқәдыргылон аҧышәарақәа. Ҩ-томкны иҟоу ари афотоальбом иагәыламлаӡеит агидрофизикатә институт  анеиҿыркаауаз раҧхьатәи амшқәа инадыркны аибашьра ҟалаанӡатәи уи аҭоурых.  Арҭ афотосахьақәа ҭоурыхуп, убри аҟынтә, аекологиа аинститут аҿы дара ирыхӡыӡаауа иҵәахны ирымоуп.

Аҧсны Аҭҵаарадыррақәа Ракадемиа иатәу агидрофизикатә институт аҧҵан зқьи жәшәи ҩынҩажәи ааба шықәса рзы. Ари аинститут аҿы еснагь рнапы алакын Амшын Еиқәа аҭҵаареи, арадиотехникатә маругақәа рыҟаҵареи. Аинститут аҧҵара ақәшәеит Аџьынџьтәылатә еибашьра дуӡӡа аилгара аамҭа. Уи шус мариамызгьы, амыругақәа зегьы  еимыхны иааган Германиантәи, урҭ нас араҟа еиҭеибыҭан. Аҭыҧ алхрагьы машәыршәа иҟамлаӡеит. Аиҧш зеиҧшу амшынтә цәаҳәа Аҧсны иахьаҵанакуа уаҳа џьаргьы иуҧылаӡом.  Иара зыҧну аҧшаҳәаҟны амшын аҵаулара иаразнак  жәаметрак иреиҳахоит. Аинститут аҿы аус зуаз аҵарауаа рзы иргылан анхарҭа ҭыҧқәагьы. Ажәак ала, мшыҧҵәала  аус зуаз аинститут  ахь ус аламала узааиӡомызт. Иара ҕәҕәала ихьчан.

Аибашьра ҟалаанӡа аинститут  инанагӡоз аусурақәа рымҽхак ҭбаан. Аҳәаанырцəтәи аилахәырақәа  Аҧсны иаҿарҵон араиотехникатә мыругақәа. Ажәакала агидрофизикатә институт ахы ахала иныҟәнагартә иҟан. Аха, аибашьрашьҭахьтәи ашықәсқәа рзы аҭагылазаашьа аҽаҧсахит. Зегьы ираҧхьагылоуп  аҵарауаа ахьмаҷу. Ҳәарада, ари аудаҩрақәа цәырнагоит. Аха, даҽаганкахьала  уажәы уаанӡатәи амҽхакқәагьы ыҟаӡам.
Агидрофизикатә институт аиқәырхаразы аҭагылазаашьа гәцаракра аҭаны иӡбан уи  аекологиа институт алаҵара. Аҭҵаарадыррақәа ракадемиа ажәалагалала  Аминистрцәа Реилазаара ақәшаҳаҭхеит. Уажәы аҵыхәтәанәти аҽазыҟаҵарақәа мҩаҧысуеит. Аекологиа аинститут аиҳабы Роман Дбар иажәақәа рыла, хықәкыс иҟоу акоуп- аҭоурых ду змоу агидрофизикатә институт аиқәырхара.

Иҳәатәуп, Аҧсны Жәлар рџьынџьтәылатә еибашьра ашьҭахь агидрофизикатә институт аусурақәа рхырхаҭра аҽшаҧсахызгьы. Уаанӡа иамаз арратә тематика аҭоурых иазынхеит, уажәшьҭа агидрофизикеи, аекологиеи ринститутқәа еицымҩаҧыргоит ирзеиҧшу аусурақәа. Урҭ рызкуп аекологиатә ҽыҧсахрақәа, аҳауатәи амшынтәи рбагақәа ашәҟәы рҭагалара.

Иҳәатәуп,  агидрофизикатә  институт аӡбахә  шиаҳахьаз  еицырдыруа  афранцыз ҵарауаҩ, амшынҭҵааҩ  Жак - Ив Кусто. Иара иҭахын араҟа аҭыхрақәа рымҩаҧгара, аха  усҟантәи аамҭазы аинститут анапхгара ақәшаҳаҭымхаӡеит.  Иара убасгьы араҟа иҟоуп  амшынтә бжьқәа рнаҩшьеи, аҵауларақәеи злагәарҭо аӡеизакырҭа. Иара хә-метрак иҵаулоуп.

Иазгәаҭатәуп,  Асовет Еидгыла аныҟаз аахыс хархәара змоу  амыругақәа реиҳарак иахьагьы аус шыруа. Иара убасгьы аинститут иамоуп амшын ихықәгылоу алабараториа. Уажәы иара аиҭашьақәыргылара мҩаҧысуеит. Агидрофизикатә институт анеиҿкааз  ашықәсқәа рзы имҩаҧысун, аамҭак азы иаанкылаз апроект ҷыда. Уи аҳәаақәа ирҭагӡаны аҵарауаа алшарақәа рзаҧҵан ҩажәи жәаба метра амшын аҵаулараҿы аус ауразы. Амшын аҵахь илбаашьҭыз зшәагаа дуум аҩны еиҧшыз амыругаҷыдҿы аҵарауаа мчыбжьык аҟынӡа иаанкыларц  рылшон. Иахьатәи аамҭазы аекологиа аинститут ахатәы мчқәа рыла аиҭашьақәыргыларатә усурақәа мҩаҧнагоит, аха араҟа иҟаҵатәу даара ирацәоуп, иуадаҩуп уи зегьы ахьӡара. Роман Дбар агәра ганы дыҟоуп, мышкызны ари аҭҵаарадырратә институт ахьӡи-аҧшеи рнаҩсгьы иамаз алшарақәагьы азыгьежьып ҳәа. Уажәы ахыбра ахәҭак аҿы аремонтә усурақәа мҩаҧысуеит. Урҭ рхырқәшара анаҩс, алабараториа ҿыц ахь ииаргарац ауп аҧсабара ҧырхага азҭо аҧсыӡхкқәа рколлекциа.  Урҭ ҧсабарала ириааиуа  рыҧшааразы аекологцәа аҧышәарақәа мҩаҧыргоит.

Аекологиатә институт  аиҳабы Роман Дбар иажәақәа рыла,  икурортәу Аҧсны азы дара имҩаҧырго агәаҭарақәа аҵак ду рымоуп. Ҳтәыла аеколог хада  агәрагара ааирҧшуеит  аинститутқәа ҩба русеицура алҵшәа бзиақәа аиуп азы.

Елана Лашәриа, Беслан ЏЬынџьал, АТ.


Оцените новость:
+1
+2
+3
+4
+5

Сохраните ссылку или поделитесь с друзьями

Возврат к списку

 
Последние события
17 Ианвар 2018
32
Аҭыжьымҭаҿы: Иаарту аицәажәара. Аҧсны ахадеи Гагра арион активи реиҧылара.
17 Ианвар 2018
21
Аҧсуа ҳәынҭқарратә аҿартә театр актиорцәеи уи ақәыргылаҩцәеи аспектакль аус адулараан ирҧылоз ауадаҩрақә ртəы иазааҭгылеит апресс-конференциаҿы.
17 Ианвар 2018
24
Абиуџьети , ашәахтәи, акредити рзы аилак имҩаҧнагаз аиҧылара иалахәын аусдкылаҩцәа.
17 Ианвар 2018
18
Уи инақәыршәаны Аҧсны атәылауаа зегьы ҩышә-нызқь рҟынӡа аҧара кредитла иргартә алшара роуеит .
17 Ианвар 2018
36
Гагра имҩаҧысит атәыла Ахадеи, аиҳабыреи, Жәлар реизара адепутатцәеи, ауаажәларреи злахәыз аизара.
16 Ианвар 2018
71
16 Ианвар 2018
56
Уи иахҟьаны иҧсҭазаара далҵит Узбекистан атәылауаҩ.
Загрузка плеера
Алаҳәарақәеи адныҳәаларақәеи
АГТРК