Март 15 ахархәаҩ изинқәа рыхьчара иамшуп.

17.03.2017
272

Март 15 ахархәаҩ изинқәа рыхьчара иамшуп. Аҧсны уи азгәарҭаӡом, аха ҳара иҳаӡбеит ҳазааҭгыларц, ҳара ҳҿы уи азакуанқәа рхархәара шымҩаҧысуа.

Ахархәаҩ  изинқәа рыхьчаразы ауаажәларратә  еиҿкаара аус ауеит    ҳтәылаҿы  2007 шықәса инаркны, убри ашықәсан Жәлар Реизара аҿы ирыдыркылаз азакуан  инақәыршәаны. Уи нахыс,  азакуан  иҿыцу аҧсахрақәа  алагаламызт.

Иахьатәи  аамҭазгьы уи аҩыза аиҿкаара шыҟоу ззымдыруагьы рацәоуп.

«Ахархәаҩ изинқәа рыхьчаразы ауаажәларратә еиҿкаара» аиҳабы  Елена Гәарамиаҧҳа лажәақәа рыла, Аҧсны ахархәаҩцәа рзы иаҧҵоу азакуан ыҟоуп, аха аус ауӡом, убри аҟнытә аиҿкаарахь ацхырааразы иадҵаало ауаа маҷуп. Уи иара убас иазгәалҭеит, аус аилыргара   ауаҩы  ишилшо  аусӡбарҭаҿы, аха  уаанӡа аӡәгьы инеигар иҭахӡам.

Ахархәаҩ  изинқәа рыхьчаразы ауаажәларратә  еиҿкаара аиҳабы дҳацны, иҟоу аҭагылазаашьа аҭҵааразы, ҳара ҳҭыхратә гәыҧ ҳарҭааит  ақалақь адәқьанқәа.  

Ахархәаҩ  изы азакуан, 26- тәи  ахәҭаҷ аҿы иаҳәоит, афатәлыхқәа рыда,  иарбанызаалак аалыҵ анааухәа ашьҭахь, еиуеиҧшым амзызқәа ирыхҟьаны иугәамҧхазар,иара  аҧхасҭа  аумҭахьазар,  жәиҧшь мшы рыҩныҵҟала иуҧсахыр шалшо. Аха, ишеилкаахаз ала, уи аҩыза азакуан ахәаахәҭратә ҭыҧқәа рҿы аӡәгьы дықәныҟәаӡом.

Аҧсны еиуеиҧшым адәқьанқәа рҿы иубарц улшоит «иааухәаз аалыҵ  архынҳәра ҟалом» ҳәа зну ақьаадқәа. Елена Гәарамиаҧҳа лажәақәа рыла, дарбанызаалак  аҭиҩы азин имам уи аҩыза аҧҟара аҧҵара.
Ахархәаҩ  иааихәаз аалыҵ ирхынҳәырц азы, аҭиҩы иҟынтәи ахәҧса зну   ақьаад иоуроуп. Ҳара ҳазҭааз амаҭәаҭирҭа адәқьанқәа рҿы уи аҩыза аршаҳаҭга уоуӡом. Аха иҟоуп џьара-џьара урҭ ахьурҭо аҭыҧқәагьы, уи еиҳарак абзазаратә  фымцатә маҭәахәқәа рыдәқьанқәа рҿоуп.
Аминистрцәа реилазаара азиндырратә ҟәша аиҳабы Лаша Цаава  ишазгәеиҭаз ала, ахархәаҩцәа еснагь ргәы рҽанызароуп, изқәиҭу   азинқәагьы  рдыруазароуп. Урҭ шеилаго анырба    изыхәҭоу   аусбарҭақәа ирыдҵаалозароуп.

Саид Џьарсалиа, Ельдар Дамиров, АТ


Оцените новость:
+1
+2
+3
+4
+5

Сохраните ссылку или поделитесь с друзьями

Возврат к списку

 
Последние события
Загрузка плеера
Алаҳәарақәеи адныҳәаларақәеи
АГТРК
        Вставить Flash