Аҧсуа шәҟәыҩҩы Џьума Аҳәба ихыҵит ҧшьынҩажәа шықәса.

22.03.2017
879

Аҧсуа шәҟәыҩҩы Џьума Аҳәба ихыҵит ҧшьынҩажәа шықәса. Дырмит  Гәлиа ихьӡ зху Аҳәынҭқарратә премиа алауреат,  Ахьӡ  - аҧша  аорден  аҩбатәи аҩаӡара занашьоу,  Аҧсны ашәҟәыҩҩцәа Реидгылеи, Ажурналистцәа реидгылеи рлахәыла, Џьума Аҳәба иҩымҭақәа аҧсуа литератураҿы иналукааша аҭыҧ ааныркылоит. Аҟәа, Ахьӡ- аҧша амузеи аҿы имҩаҧысит еицырдыруа ашәҟәыҩҩы ииубилеи иазкыз аныҳәатә хәылҧазы.

Збаҩхатәра еицамкуа, Аҧсны анҭыҵгьы еицырдыруа аҧсуа шәҟәыҩҩы Џьума Басариан-иҧа Аҳәба диит 1937 шықәсазы Очамчыра араион Аҭара ақыҭан. Дхәыҷаахыс  аҵара  иазҿлымҳаз Џьума Аҳәба диплом ҟаҧшьыла далгеит Аҟәатәи арҵаҩратә ҵараиурҭеи  Горки ихьӡ зху Москватәи алитературатә институти. Убри инаркны иҧсҭазаара здиҳәалаз арҿиаратә ус дацәхьамҵӡакәа, хыҧхьаӡара рацәала иҩымҭа хьӡырҳәагақәа адунеи ҳамҭас  иазынижьит. Џьума Басариан-иҧа Аҳәба ҧшьынҩажәа шықәса ихыҵра иазку аныҳәатә хәылҧазы аҿы иқәгылаз Аҧсны ашәҟәыҩҩцәа Реидгыла аиҳабы Вахтанг Аҧҳазоу иазгәеиҭеит, аиубилиар иҧсҭазаара иацыз ауадаҩрақәа зегьы риааира шилиршаз.

Џьума  Аҳәба иира мшы аҳаҭыр азы Аҧсны Ахада иҟаиҵаз адныҳәалара даҧхьеит уи иабжьгаҩ Владимир Занҭариа.

Акультуреи аҭоурыхтә культуратә ҭынха ахьчареи рминистр  Ельвира Арсалиа  адныҳәалара ҟаҵо дазааҭгылеит, аҧсуа сахьаркыратә литератураҿы Џьума Аҳәба илагала. Иара убас иаҧхьан Аҧсны аҧыза – аминистр ихьӡала аиубилиар изкыз адныҳәаларатә шәҟәы.

Аҧсны ашәҟәыҩҩцәа Рассоциациа аиҳабы Мушьни Лашәриа иқәгылараҿы иҳәеит, аиубилиар иҩымҭақәа рыла иширҭбааз аҧсуа жәабжьқәа рхаҿра.

Џь. Аҳәба ирҿиаратә ҧсҭазаараҟны акыр зҵазкуа хҭысқәоуп Д.И.Гәлиа ихьӡ зху Аҧснытәи аҳәынҭқарратә премиа ианашьареи Аҧсны акультура зҽаҧсазтәыз аусзуҩы  ҳәа ахьӡ ихҵареи.  

Ирҿиамҭаҿы иналукааша апрозатә ҩымҭақәа рацәоуп ҳәа азгәеиҭеит аҵареи аҵарадырреи амиинстр Адгәыр Какоба. Џь. Аҳәба илаз ганрацәалатәи абаҩхатәра алшара инаҭеит  Киевтәи акиностудиа иҭнахыз раҧхьаӡатәи аҧсуа телефильм «Созерцание» асценари аҩреи, ароль хадақәа руак анагӡареи. Иара убас иҩхьан асахьаркыратә -документалтә фильм «Кьаразаа рҭоуба» азы асценари. Аҧсуаҭҵааратә институт ахьӡала адныҳәалара ҟаҵо, уи аиҳабы Арда Ашәба, ашәҟәыҩҩы иаҧхьаҟа игәҭакқәа рынагӡараҿы ақәҿиарақәа изеиҕьаишьеит.

Ашәҟәыҩҩы иҧсҭазаараҿы акырӡа ихьааигаз, агәаҟра изаазгаз хҭысуп Аҧсны жәлар рџьынџьтәылатә еибашьра. Аха ҳаҕацәа Џьума Аҳәба  идоуҳа беиа рзымхәаҽит.

Ари ахәылҧаз аҟны Џьума Аҳәба  изы ихадаз ииубилеи изааигәо иҩызцәа рыбжьара иахьазгәеиҭаз ауп. Уи изыннажьит   ацәанырра ҧхақәеи  агәалаҟазаара бзиеи.

Ҳ. Гәымба, С. Аиба,АТ.




Оцените новость:
+1
+2
+3
+4
+5

Сохраните ссылку или поделитесь с друзьями

Возврат к списку

 
Последние события
8
Раҧхьатәи азҵаара азкын Алашарбага аҳаблаҿ иҟоу агәамкажьырҭа апроблема ӡбашьас иарҭаз .
31
30 шықәса рыҩныҵҟа Платон Бебиа ироман аҧҵаразы аматериалқәа еизигон,хәышықәса аҩра даҿын.
41
Убри инамаданы, Аҧсны Ашәҟәыҩҩцәа реидгыла еиҿнакааит ашәҟәыҩҩы игәаларшәара иазкыз ахәылҧаз.
Алаҳәарақәеи адныҳәаларақәеи
АГТРК