Аҧсны жәлар ратист, Аҧсны акомпозиторцәа Реидгыла ахантәаҩы Кәасҭа Ченгьелиа 87 шықәса ихыҵит.

22.03.2017
876

Аҧсны жәлар ратист, Аҧсны акомпозиторцәа Реидгыла ахантәаҩы  Кәасҭа Ченгьелиа   87 шықәса ихыҵит. Абарҭ ашықәсқәа  рахьтә 55 шықәса иара напхагара аиҭон Очамчыратәи аетнографиатә ансамбль «Ерцахә». Аҟаза ихатә  гәаҧхарала ансамбль аҿы иусура аанижьит. Очамчыра араион акультура аҟәшаҿы Кәасҭа Ченгьелиа  днаҧхьан жәашықәсалатәи иааҧсарақәа рзы иҭабуп ҳәа иарҳәеит.  
  
Кәасҭа Ченгьелиа  данхәыҷыз инаркны амузыкахьы азҿлымҳара ааирҧшуан. Зынӡа дышмаҷӡаз аскрипка арҳәашьа иҵеит. Аҟазара амузыка ахырхаҭраҿы уи иара раҧхьатәи ишьаҿақәа ракәхеит. Зқьи жәшәи ҩынҩажәи ааба шықәса рзы Кәасҭа Ченгьелиа дҭалоит ауниверситет, афизика-математикатә факультет, аха  5-тәи акурс анаиркы, игәы иҭеикит амузыка ахь дхынҳәырц, иагьиӡбеит аконсерваториа дҭаларц.  1970 шықәсазы далгоит Қарҭтәи аконсерваториа. Усҟан ауп ианаҧиҵо раҧхьатәи иашәагьы, уи иахьӡын «Сыбла еиқәара».  Усҟан Кәасҭа Ченгьелиа ихыҵуан 29 шықәса.

1962 шықәсазы еиҿикаауеит  ансамбль “Риҵа”, уи ашьҭахь иаҧиҵоит Очамчыратәи ансамбль «Ерцахә», уи иахьа уажәраанӡагьы напхгара азиуан.  Кәасҭа Ченгьелиа  арахь данааиз ари ансамбль еиднакылоз аколлектив иалаз аҧсуаа х-ҩы заҵәык ракән, арепертуар акәзар, излашьақәгылаз ақырҭуа шәақәа рыла акәын. Кәасҭа Ченгьелиа илиршеит арепертуар аҧсуа шәақәа ралагалара, уи моу, инарыгӡоз  ашәақәа зегьы аҧсшәахь риагара.

Аҧсны Жәлар рартист аамҭаказы напхгара азиуан жәларбжьаратәи азҿлымҳара змаз,  еицырдыруаз абыргцәа рансамбль «Нарҭаа».  Ирацәоуп  ансамбль ианаршьахьаз  аҧхьахәқәа, урҭ рҭаахьан аҳәынҭқаррақәа жәпакы. 22 ҳәынҭқарра рхаҭарнакцәа злахәны Венгриа имҩаҧысуаз жәларбжьаратәи  ашәаҳәаратә фестиваль аҿы абыргцәа рансамбль «Нарҭаа» аиааира агеит. «Иара иахьагьы  аҟазара сыҧсҭазаара еиҿызкаауа ак акәны иҟоуп, иҳәоит аиубилиар». Акомпозитор иқәра иахьмырҧшӡакәа ҳаамҭа иақәшәо атехнологиақәа рыла аус иуеит.  Иара акомпиутер  ихы иаирхәоит, ашәақәа рыҩреи рҭаҩреи рҿы.
Кәасҭа Ченгьелиа  иаҧҵамҭақәа рҟынтә иаликаауеит аибашьра анцоз  иаҧиҵаз «Аҧҳәызба ар рымаҭәа зшәу», «Аиааира» уҳәа ажәлар бзиа ибаны ирҳәо ашәақәа. Акомпозитор  иазгәеиҭоит, ашәа аҧҵаразы атема аҧсҭазаара аҟынтә ишыиго.

Аҧсны Жәлар рартист ансамбль Ерцахә аҿы иусура ахьаанижьыз иколлектив аҿы еилкаарыла иазнеит. Иазгәаҭан Кәасҭа Ченгьелиа еиҧш зҧышәа ҿырҧшыгоу акомпозитор аус ицыруртә еиҧш алшарақәа ахьрымаз дара рзы акыр шаҵанакуа.

Очамчыра араион акультура ашьҭыхреи, аҟазара азааҧсареи рзы Кәасҭа Ченгьелиа ианашьан аҳаҭыртә дырга.

«Сҭәымҭа сҭагылоуп,» иҳәоит иара дыхәмаруа. Дырмит Гәлиа ипремиа алауреат, Ахьӡ-аҧша аорден ахҧатәи  аҩаӡара занашьоу, акомпозитор Кәасҭа Ченгьелиа Очамчыратәи аетнографиатә ансамбль  “Ерцахә” аҿы иусура аанижьит, аха иара, ашәақәа урҭ раҧҵареи рынагӡареи уаанӡеиҧш иахьагьы инапы алакуп.

Алиас Корсаиа,  Анатоли Маланиа,АТ.


Оцените новость:
+1
+2
+3
+4
+5

Сохраните ссылку или поделитесь с друзьями

Возврат к списку

 
Последние события
21
30 шықәса рыҩныҵҟа Платон Бебиа ироман аҧҵаразы аматериалқәа еизигон,хәышықәса аҩра даҿын.
31
Убри инамаданы, Аҧсны Ашәҟәыҩҩцәа реидгыла еиҿнакааит ашәҟәыҩҩы игәаларшәара иазкыз ахәылҧаз.
42
Аҭыжьымҭаҿы:Ианҭаха ашьҭахь 143 медаль «Аиааиразы». Аҧсны Ахада аҳамҭақәа рнапаҿы ириҭеит иҭахаз афырхацәа рҭаацәа.
45
Ари ацәыргакәҵа еизнагеит жәлар рҟазара знапы алаку аҧышәа змоу рыдагьы, иахьа уажәраанӡа зхы ӡырзымгац, аха зус бзиабарала иазнеиуа аҿар.
Алаҳәарақәеи адныҳәаларақәеи
АГТРК