Гагра араион аҿы аҭыҧ змаз аҧсабаратә рыцҳара иахҟьаны аӡы зҵалаз, ибгаз амҩадуқәеи ахыбрақәеи реиҭашьақәыргылара иаразнак нап шаркызгьы, макьанагьы иҟаҵатәу маҷӡам. Амш цәгьа ахҟьа-ҧҟьақәа иаарласны раҧыхразы иаҧҵан ареспубликатә комиссиа. Уажәы араион ахадареи, ауааҧсыреи, атәыла анапхгареи, зегьы рымчқәа еилаҵаны аусурақәа ирыцырҵоит. Ааха зауз ауааҧсыра рхала рымч ахьынӡақәхо рыҩны-ргәара дрыцқьоит. Ҭыҧқәак рҿы атехника ҷыда аус ауеит. Аӡы зҵалаз аҭаацәарақәа Гагра араион ахадара ашҟа арзаҳалқәа рҩит ацхыраара рырҭарц азы. Ажәабжь иацырҵоит ҳкорреспондентцәа.